Zdareńnie adbyłosia ŭ niadzielu 10 sakavika ŭ bary 4-4-2 na vulicy Zybickaj. U toj dzień u ramkach anhlijskaj Premjer-lihi sustrakalisia łondanski «Arsienał» i «Mančester Junajted». «Arsienał» atrymaŭ pieramohu ź likam 2:0.

Fan-kłuby «MIU» i «Arsienała» — adny z samych šmatlikich u Biełarusi. Zvyčajna zaŭziatary hetych kamand źbirajucca dla prahladu matčaŭ na roznych placoŭkach, kab paźbiehnuć patencyjnych kanfliktaŭ. Na hety ž raz na Zybickuju pryjšło kala 60 fanataŭ «MIU» i kala 15 — «Arsienała».

Sakratar aficyjnaha fan-kłuba «Mančester Junajted» u Biełarusi Uładzimir Sazonaŭ kaža, što bar «4-4-2» zaprasiŭ da siabie prychilnikaŭ «čyrvonych djabłaŭ» naprykancy minułaha hoda. Fanaty «Arsienała» ž śćviardžajuć, što heta placoŭka «naležyć» im, tamu i nie źbiralisia pakidać ustanovu.

Kali hulnia skončyłasia, to pamiž zaŭziatarami zaviazałasia sutyčka. U vyniku adzin z fanataŭ «Arsienała», jakoha zavuć Illa, śćviardžaje, što jaho źbili.

«Fanaty «MIU» raŭli absalutnaje dzikunstva, pahražali zaŭziataram «Arsienała», pakazvali faki. Padčas hulni zaŭziatary pavodzili siabie nieadekvatna. Kali «Arsienał» zabiŭ hoł, to moj brat ustaŭ na kresła, dyk vybili kresła zzadu. Tatalnaje bydła, viarški biełaruskaha bydła. Adekvatnyja ludzi siabie tak pavodzić nie buduć. Krajnie ahresiŭnaje zaŭzieńnie. U Minsku nie tak šmat miescaŭ, dzie možna hladzieć matčy», — raskazaŭ Illa ŭ svaim instahramie.

Kali hulnia skončyłasia, to pamiž fanatami pačałasia słoŭnaja pierapałka, pakazvali adzin adnomu faki. «Mnie prylacieła niezrazumieła adkul, sprabavali raźbić telefon, pinali nahami, u mianie šyška, pałamany nos. Ja vyklikaŭ milicyju. Spačatku chacieŭ pisać zajavu, ale nie staŭ pisać, bo mianie prypałochali sumiesnym chulihanstvam. Mnie potym skazali, što razvodzili mianie jak łocha, ale ja napisaŭ, što nie maju pretenzij. Chłopcy, što byli ŭ aporniku sa mnoj, vybačylisia, prapanavali pasiadzieli papić piva, ale mnie niecikava stasavacca z bydłam», — adznačyŭ Illa.

Uładzimir Sazonaŭ, jaki pradstaŭlaje fanataŭ «MIU», kaža, što abrazy čulisia z abodvuch bakoŭ. «Jašče ŭ pierapynku padychodzili da chłopcaŭ z «Arsienała» i kazali, kali matč skončycca na vašu karyść, to vam lepš adrazu raspłacicca i syści i nie pravakavać kanflikty.

Kali vy zachodzicie ŭ bar, dzie siadzić 60 fanataŭ «Mančestera», to treba mieć niejki instynkt samazachavańnia ci što».

Uładzimir kaža, što nie moža śćviardžać, što niechta biŭ paciarpiełaha, ale i advarotnaha skazać nie moža. «Mahčyma, jon prosta pavaliŭsia, kali ich razdymali, i ŭdaryŭsia nosam. Kali my pačali raźnimać bojku, to adčuvaŭ udary pa śpinie. Mahło być što zaŭhodna. Sam kanflikt byŭ nie bolš za chvilinu», — raskazvaje Uładzimir.

AMAP pryjechaŭ u bar dosyć chutka. Pa słovach Uładzimira, pravaachoŭniki pavodzili siabie vielmi karektna. «Jany dumali, što tam realna fanaty sčapilisia, a tut nievialikaja łakalnaja bojka. My ličym, što ŭ hetaj situacyi nie lepšym čynam paviali siabie abodva baki. Ja b asabista nie pajšoŭ hladzieć futboł u bar, dzie ŭsio było b zaviešana atrybutykaj «Arsienała», — raskazvaje Uładzimir Sazonaŭ.

Jon absalutna abviarhaje słovy, što za «MIU» zaŭziejuć niejkija «hopniki i bydła». «Amal usie majuć vyšejšuju adukacyju, heta ludzi starejšyja za 28 hadoŭ, šmat biznesmenaŭ, inšych paśpiachovych ludziej», — raskazvaje Sazonaŭ.

Takija kanfliktnyja situacyi zdarajucca nie tak časta. Zvyčajna fan-kłuby zachodniejeŭrapiejskich kłubaŭ hladziać hulni na roznych terytoryjach, ale na hety raz vyjšła voś takaja nakładka.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?