Arkadź Izrailevič, pradprymalnik ź pieršaj sotni samych paśpiachovych i ŭpłyvovych biznsesoŭcaŭ Biełarusi, ličyć, što kanfliktnuju sytuacyju stvaryli čynoŭniki, jakija davali dazvoł na budaŭnictva, paviedamlaje Radyjo Svaboda.

«U akcie na ziamlu nie było nijakich abmiežavańniaŭ»

13 červienia hazeta «Novy čas» apublikavała raśśledavańnie pra ŭładalnikaŭ i investaraŭ restaranu «Pojediem pojedim». Siarod inšych aŭtary nazyvajuć imia Arkadzia Izraileviča i sprabujuć davieści suviaź pamiž zabudoŭnikam restaranu, kampanijaj «BiełRiestInviest», i hrupaj kampanijaŭ «IV», jakaja naležyć biznesoŭcu.

«Maja kampanija nia maje da hetaha nijakaha dačynieńnia. Dy pałova z hetaha śpisu nia maje. Siarhiej Levin (uładalnik fabryki «Sonca». — RS) taksama, — kaža Arkadź Izrailevič u kamentary dla Radyjo Svaboda. — Tyja, chto heta pabudavaŭ, — maje siabry, ale jurydyčna my nie źviazanyja. I ja maŭčaŭ, pakul ź mianie nie zrabili vierchavoda habrejskaj mafii. Mianie heta aburyła!»

Pavodle Arkadzia Izraileviča, jahonyja siabry-restaratary nabyli ŭ indyvidualnaha pradprymalnika ŭčastak, pryznačany dla budaŭnictva abjektu prydarožnaha servisu. Na toj momant tam užo išli budaŭničyja raboty.

«Maje siabry kupili niedabudavany abjekt. I tady hetaja budoŭla nikoha absalutna nie chvalavała. Ja doŭha žyŭ u Drozdavie, prajaždžaŭ pobač, bačyŭ, jak tam išło budaŭnictva. Nivodnaha pikietu nie było, usio było spakojna. Heta jašče da 2010 hodu», — tłumačyć jon.

Kali ŭ 2012-m u prajekcie pačalisia prablemy, siabry źviarnulisia da jaho pa paradu, kaža Izrailevič.

«Ja pieršaje, što skazaŭ: «Pakažycie mnie akt na ziamlu». U im nie było anivodnaha abmiežavańnia! Ja vočy vyłupiŭ».

Jon tłumačyć, što infarmacyja pra najaŭnaść na ŭčastku historyka-kulturnaj kaštoŭnaści i abmiežavańni, jakija nakładajuć na ŭładalnika zony jaho achovy, musić znachodzicca ŭ hetym dakumencie.

«U mianie samoha byŭ vypadak, kali ja kuplaŭ histaryčny pomnik. U akcie na ziamlu musiać dakładna stajać usie abmiežavańni, paznačanaja achoŭnaja zona, usio, što ty možaš i nia možaš rabić. Tady chočaš kuplaj, chočaš — nie kuplaj. Usio adkryta, — kaža biznesoviec. — Ja na svaje vočy bačyŭ ichny akt na ziamlu — jon byŭ čysty, biez usialakich abmiežavańniaŭ, buduj što chočaš!»

Arkadź Izrailevič davodzić, što navat kali akt byŭ vydadzieny z pamyłkami, to miežy zonaŭ achovy musili być paznačanyja pry zaćviardžeńni prajektu. Ale i hetaha nie było.

«Ja adnojčy budavaŭ žyły dom, i adkrylisia mohiłki časoŭ vajny. Mnie daviałosia atrymlivać novyja ŭzhadnieńni, bo heta dakładna adsočvaje ekspertyza. Jany (uładalniki restaranu. — RS) ekspertyzu prajšli, bo inakš im nia vydali b dazvołu na budaŭnictva.

— Vy dumajecie, što Ministerstva kultury davała im dazvoły na ŭsich stadyjach?

— Ja nia dumaju, ja ŭpeŭnieny. Biez uzhadnieńnia ź Ministerstvam kultury heta niemahčyma!

Budoŭlu na prajekcie, kaža Arkadź Izrailevič, spynili ŭ 2013-m. Pakul adkaznyja ŭstanovy ŭzhadniali ŭsie patrebnyja dakumenty, prajšło jašče 5 hadoŭ.

«Ułady svaju pamyłku pryznavać nie chacieli, tamu začapilisia za toje, što treba rabić PDP (plan detalovaha planavańnia. — RS). Dla kožnaha PDP treba rabić hramadzkaje abmierkavańnie. Ja viedaju, što jano było, kali PDP zaćvierdzili. Vynikaŭ hramadzkaha abmierkavańnia nichto nie abskardžvaŭ, — tłumačyć Izrailevič. — Jak tolki atrymali ŭsie dakumenty, tak i zdali».

«Dziaržava trochi padstaviła ludziej»

Sam biznesoviec — karenny miančuk. Na pytańnie, ci viedajuć pra Kurapaty jahonyja siabry-restaratary, adkazvaje tak:

«Ja dumaju, što viedali. Davajcie voźmiem inšy prykład — Jama (memaryjał na miescy masavaha źniščeńnia viaźniaŭ Mienskaha hieta. — RS). Čamu tam nichto nie patrabuje pazakryvać restarany? Čamu nikomu nia pryjdzie ŭ hałavu zakryć kazino ŭ hateli «Jubilejny»? Va ŭsim śviecie tak jość.

Nakolki mnie viadoma, kali hetaje pytańnie ŭźnikła, Zajdes (Leanid Zajdes — adzin z uładalnikaŭ restaranu.. — RS) prapanoŭvaŭ adzin damok addać pad memaryjalnyja spravy. Ale jany (abaroncy Kurapataŭ. — RS) tam zładzili sprečku, bo nia viedali, chto heta budzie absłuhoŭvać», — kaža Arkadź Izrailevič.

Da pratestoŭcaŭ, jakija štodnia pikietujuć restaran, jon stavicca nehatyŭna. Miarkuje, što pratesty nosiać «zamoŭleny» charaktar, a siarod pikietoŭcaŭ — «deklasavanyja elementy».

«Ja hladzieŭ dva videasiužety. Pieršy — jak žančyna kusałasia. Joj skazali «zrabić skandał», jana dakładna zadaču vykanała. I druhi siužet, kali na kahości nibyta najechali. Dyk hety ŭ šałomie — jamu zadajuć pytańnie, jon paŭtaraje try zavučanyja frazy. Pryčym vidać, što krok u bok — i jon tablicu množańnia nie zhadaje!» — interpretuje Arkadź Izrailevič pabačanaje na videa.

Jaho ździŭlaje, čamu nichto nie pratestavaŭ suprać adkryćcia i pracy ŭ hetym miescy aŭtazapravačnaj stancyi. Va ŭsioj hetaj sytuacyi Arkadź Izrailevič bačyć «padvojnyja standarty» i žadańnie peŭnych palitykaŭ i błohieraŭ pryciahnuć da siabie ŭvahu.

Ale siarod znajomych i siabroŭ samoha biznesoŭca jość i tyja, chto ideju restaranu kala Kurapataŭ nie padtrymlivaje.

«I ja ich pavažaju, i pazycyju ichnuju pavažaju. Ale jany tudy nie iduć (pikietavać. — RS). U mianie jość znajomaja, jakaja ŭsio žyćcio pražyła na vulicy Mirašničenki (pobač z Kurapatami. — RS). Kali jana była ŭ škole, usio heta raskopvałasia, — raspaviadaje Arkadź Izrailevič. — Ale toje, što adbyvajecca ciapier kala restaranu, — heta klaŭnada».

Biznesoviec ličyć, što ŭ ciapierašnim kanflikcie vakoł restaranu, vinavatyja tyja, chto davaŭ dazvoł na budaŭnictva. «Dziaržava trochi padstaviła ludziej», — kaža jon.

Da prapanovaŭ pieranieści restaran u inšaje miesca biznesmen stavicca z sarkazmam i kaža, što jana nierealistyčnaja.

«Ujavicie, što vam i žycharam vašaha doma zachaciełasia pierajechać u inšy rajon. I vy bieracie dom i pieranosicie. Tam niama padklučeńnia ani vady, ani hazu, ani elektryčnaści, ani kanalizacyi. A asfalt? A padmurki?»

Hetaksama nie padabajecca biznesmenu ahučanaja pratestoŭcami ideja zrabić u budynku restaranu muzej.

«Vam ža prapanoŭvali damki pad muzej, i ŭ vas nie chapiła arhanizavanaści ich ŭziać na siabie, a vy chočacie takuju budyninu?! — kaža jon. — Heta «švondziery», ja pa-inšamu nie skažu. Heta ludzi, jakija ničoha nie stvarajuć, ale hatovaje chočuć zabrać i pieraraźmierkavać».

«Davajcie vučycca na pamyłkach i pavažać investara»

Arkadź Izrailevič taksama bačyć u publikacyjach i kamentarach u sacyjalnych sietkach prajavy antysemityzmu, na jakija adreahavaŭ vostra. 15 červienia onłajn-vydańnie «Ježiednievnik» raźmiaściła błoh Arkadzia Izraileviča pad nazvaj «Navošta deputat Alena Anisim raskručvaje ŭ Biełarusi «habrejskuju zmovu»?».

Zasnavalnikam vydańnia «Novy čas», u jakim Izraileviča nazvali datyčnym da «Pojediem pojedim», jość Tavarystva biełaruskaj movy. Tamu biznesmen zrabiŭ staršyniu arhanizacyi deputatku Pałaty pradstaŭnikoŭ Alenu Anisim abjektam svajoj publikacyi.

Pryčyny, jakija prymusili jaho ŭźniać temu antysemityzmu pry abmierkavańni sytuacyi vakoł restaranu, Arkadź Izrailevič tłumačyć tak.

«Jak tolki ja na fejsbuku pačynaŭ kamentavać svaju pazycyju, na mianie tut ža sypałasia: «A voś kali b u Aśviencimie byŭ «Žyd-choł»?». U kožnaha byŭ nievysoki parožak, kab pierajści da «morda žydoŭskaja, kudy ty lezieš», — apisvaje svaje adčuvańni biznesmen. — U mianie abvostranaje adčuvańnie antysemityzmu, ja ŭsio heta ź dziacinstva pieražyvaŭ. Ciapier antysemityzmu mienš, ale ŭsio adno jość. I kali na hetym sajcie sabrali ŭsich znajomych pamiž saboj habrejaŭ i abjadnali ich pad ahulnuju antynarodnuju temu, mnie heta było vielmi niepryjemna».

Mnohija viadomyja ludzi vykazvali svajo mierkavańnie, što pobač z Kurapatami nia moža być zabaŭlalnaha abjekta. Na takuju pazycyju Arkadź Izrailevič reahuje nastupnym čynam:

«A jak vy staviciesia, što voś tut achviary stalinskich represijaŭ, a praz 50 km — «linija Stalina»? Ci praz 10 km — pomnik Leninu, jaki ŭsio heta arhanizavaŭ? A što b vy tady skazali, kali b u Jerusalimie pobač ź «Jad va-Šem» stajaŭ dom-muzej Hitlera?!»

Biznesoviec zaklikaje šukać kampramis z uładalnikami restaranu i miarkuje, što radykalnaje raźvićcio padziejaŭ adpałochvaje ad Biełarusi zamiežnych investaraŭ.

«Va ŭsim śviecie jość śviatyni. Ale čamu tady dziaržava nia voźmie i nie adharodzić heta? Čamu nia zroblenyja achoŭnyja zony? — zadaje jon pytańni. — Vy tam bačyli šyldy, što tut achoŭnyja zony i što tam nielha? U horadabudaŭničych dakumentach nie było achoŭnaj zony! Dyk davajcie na hetych pamyłkach vučycca i pavažać investara. Voś amerykancam adbili achvotu ŭkładać. A tam zaryta miljonaŭ 5-7, na voka mahu skazać. I heta toje samaje raźvićcio prydarožnaha servisu, pra jakoje ŭsie tak kažuć!»

Arkadź Izrailevič miarkuje, što było b pravilna viarnucca da prapanovy haspadaroŭ ab pieradačy adnaho z budynkaŭ dla memaryjalnych metaŭ. Ale, kaža biznesmen, jon nia viedaje, ci hetaja prapanova jašče dziejničaje.

«Pravilna było b zrabić na terytoryi ŭstanovy nievialiki memaryjał. Ludzi buduć chadzić, i jany buduć bačyć, — kaža biznesmen Arkadź Izrailevič. — Viedajecie, u mianie jość lubimaja prymaŭka: «Habrejaŭ zaŭždy cikavić adno pytańnie: nie čamu zabirajuć, a kamu addaduć». Nia treba rabić ź mianie vyludka, ja narmalna staŭlusia da hetych pachavańniaŭ. Viedaju, što habrei tam lažać. Ale jość žyvyja, a jość miortvyja. Davajcie dumać pra žyvych».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?