Patryjarch Varfałamiej, fota ź Vikipiedyi.

Patryjarch Varfałamiej, fota ź Vikipiedyi.

«Vajna pamiž Ukrainaj i Rasijaj idzie nie tolki na terykonach Danbasa, ale i na mižpravasłaŭnaj arenie». Takoje vykazvańnie možna pračytać na adnym z ukrainskich partałaŭ.

Vajna idzie vakoł nadańnia ŭkrainskamu pravasłaŭju — budučaj Ukrainskaj Carkvie — aŭtakiefalii. Pakul što viadziecca psichałahičnaja vajna. Ale ad hetaha napruha nie spadaje. Pravasłaŭny śviet na chvilinu byŭ zastyŭ, kali daniesłasia viestka, što Usialenski Patryjarch Varfałamiej straciŭ prytomnaść. Na ščaście, heta praciahvałasia karotki čas. Ale viadomaja relihijaznaŭca, kiraŭnica adździeła historyi relihii Instytuta fiłasofii Nacyjanalnaj akademii navuk Ukrainy Ludmiła Filipovič nie vyklučaje, što Maskva, kali joj nie ŭdasca nacisnuć na tureckaha prezidenta Redžepa Erdahana, a praz Erdahana — na Varfałamieja, moža ŭžyć suprać Usialenskaha Patryjarcha krajnija srodki. Jakija takija srodki — my viedajem z historyi. Heta i ledarub u dačynieńni da Lva Trockaha, i vybuchovaje prystasavańnie ŭ aŭtamabili Zielimchana Jandarbijeva, i harbata z pałonijem dla Alaksandra Litvinienki, i bajavoje atrutnaje rečyva dla Siarhieja Skrypala i jaho dački… Arsienał srodkaŭ u Maskovii zaŭsiody byŭ bahaty.

U svajoj papiaredniaj publikacyi ja pakazaŭ na ŭzrosłuju aktyŭnaść Maskoŭskaj Patryjarchii na mižpravasłaŭnaj arenie, jaje sproby «apracavać» pravasłaŭnuju Pientrachiju — pradstajalnikaŭ Aleksandryjskaj, Antyjachijskaj, Jerusalimskaj i Kiprskaj cerkvaŭ.

Toje, što Daniłaŭ manastyr nie vychodzić na prosty kantakt z hałavoj Pientarchii — archibiskupam Novaha Ryma, — davoli pakazalna i zrazumieła.

Adnosiny pamiž Usialenskim i Maskoŭskim patryjarchatami nikoli nie byli dobrymi. Stvoranaja z łaski Stalina, ciapierašniaja RPC nie prychoŭvaje svajo žadańnie zaniać pieršuju pazicyju siarod 14 kananičnych (heta značyć pryznanych Fanaram) pravasłaŭnych cerkvaŭ. Akramia taho, Maskva pamiataje, što paśla raspadu Rasijskaj impieryi archibiskup Novaha Ryma pryniaŭ pad svoj amafor pravasłaŭnyja cerkvy Finlandyi, Łatvii dy Estonii. Dziakujučy Stalinu pravasłaŭnych chryścijan dźviuch apošnich krain Maskoŭskaja Carkva viarnuła pad svaju ruku tolki pa niamiecka-savieckaj vajnie.

Daniłaŭ manastyr nie vychodzić na naŭprostavy kantakt z Fanaram jašče i tamu, što pamiataje, jak u 1994—1999 hh. adnaviłasia Estonskaja Apostalskaja Pravasłaŭnaja Carkva. Pamiataje, što, niahledziačy na ŭsie jaho demaršy, Fanar adnaviŭ dziejańnie tomasu 1923 h. ab nadańni Estonskaj Carkvie aŭtanomnaha statusu. A dalej śviatary i vierniki sami vyznačali, da jakoj Carkvy dałučycca im dy ich parafijam. Praces doŭžyŭsia 5 hadoŭ.

Maskva i siońnia ličyć Estoniju svajoj «kananičnaj terytoryjaj». Pahatoŭ jana ličyć «kananičnaj terytoryjaj» i Ukrainu. Darma, što tomas 1924 h. ab nadańni aŭtakiefalii Pravasłaŭnaj Carkvie ŭ Polščy nie skasavany, a pavodle hetaha tomasu zachodniebiełaruskija i zachodnieŭkrainskija ziemli ŭžo byli vyviedzieny z-pad jurysdykcyi Maskoŭskaj Carkvy. U skład Maskoŭskaj Carkvy ich viarnuli volaju Stalina. Bolš za toje, u Daniłavym manastyry vydatna viedajuć i toje, što Kanstancinopal nikoli nie pieradavaŭ Kijeŭskuju mitrapoliju i staryja krymskija jeparchii Maskvie. U pryrodzie niama adpusknych hramataŭ na hety kont. «Suviazi Kijeva sa Stambułam, — piša maskoŭski bahasłoŭ protadyjakan Andrej Kurajeŭ, — bolš nadziejnyja, čym z Maskvoj». (Za abjektyŭnaść darujem nacyjanalistu Kurajevu, što Kanstancinopal jon nazyvaje Stambułam, a Usialenskaha Patryjarcha — tureckim.)

U svajoj papiaredniaj publikacyi ja pisaŭ, što jość dva varyjanty vyrašeńnia ŭkrainskaha carkoŭnaha pytańnia.

Pieršy: kali Ukrainskaja Pravasłaŭnaja Carkva Kijeŭskaha Patryjarchatu (UPC KP) i niekananičnaja Ukrainskaja Aŭtakiefalnaja Pravasłaŭnaja Carkva (UAPC) nie pryjduć da zhody, Varfałamiej moža ŭmyć ruki.

Druhi varyjant: Varfałamiej moža sklikać archirejaŭ UPC KP, UAPC dy UPC Maskoŭskaha Patryjarchatu na sabor dziela abrańnia pradstajalnika novaj Carkvy, a potym vydać tomas ab nadańni joj aŭtakiefalii.

Ciapier, paśla vizitu pradstaŭnikoŭ Novaha Ryma ŭ Eładskuju Carkvu, jaki adbyŭsia ŭ siaredzinie hetaha miesiaca, vymaloŭvajecca treci varyjant.

U svoj čas u pravasłaŭi była naradziłasia ideja vypracavać niejki akt ab paradku nadańnia aŭtakiefalii. Hety akt mierkavałasia pryniać na Śviatym i Vialikim Sabory Pravasłaŭnaj Carkvy, jaki ŭ 2016 h. adbyŭsia na Krycie. Na pieradsabornych naradach była vypracavana pracedura, u adpaviednaści ź jakoj dla nadańnia aŭtakiefalii patrabavaŭsia kansensus 14 ahulnapryznanych pravasłaŭnych cerkvaŭ (15-ja, Pravasłaŭnaja Carkva ŭ Amierycy, źjaŭlajecca častkova pryznanaj). Takim aktam, kali b jon byŭ pryniaty, Maskoŭski Patryjarchat i inšyja cerkvy mahli źviazać ruki Usialenskim Patryjarchu i Sinodu. Jak viadoma, Maskoŭskaja Carkva praihnaravała Sabor, a dakumient ab paradku nadańnia aŭtakiefalii na im navat nie abmiarkoŭvali. Takim čynam, ruki Usialenskaha Patryjarcha zastalisia volnyja.

Majučy svabodu dziejańniaŭ i padtrymany Sinodam Kanstancinopalskaj Carkvy jak Carkvy-Maci dla pravasłaŭnych chryścijan sučasnaj Ukrainy (z Krymam), Usialenski Patryjarch, jaki nie pryznaje dałučeńnia Kijeŭskaj mitrapolii i krymskich jeparchij da Maskoŭskaj Carkvy, moža, jak i pry chroście Kijeŭskaj dziaržavy ŭ 988 h., pastavić va Ukrainie svajho mitrapalita. I nie abaviazkova heta budzie niechta z archirejaŭ sučasnych UPC Kijeŭskaha i Maskoŭskaha Patryjarchataŭ abo UAPC. U składzie Kanstancinopalskaj Carkvy ŭ Kanadzie, Złučanych Štatach dy ŭ inšych krainach majecca nie adna ŭkrainskaja jeparchija i, pavodle maich padlikaŭ, 9 archirejaŭ-ukraincaŭ. A moža Fanar, jak i ŭ estonskim vypadku, pastavić całkam niejtralnaha čałavieka — hreka. I ŭžo hety pradstajalnik razam ź viernikami i duchavienstvam UPC KP, UPC MP dy UAPC, jakija pierajduć pad jaho amafor, budzie budavać novuju Ukrainskuju Carkvu.

Voś hetaj novaj Carkvie, uznačalenaj mitrapalitam, jakoha pastaviŭ Sinod Kanstancinopalskaj Carkvy, Usialenski Patryjarch i moža dać tomas ab aŭtakiefalii. Takim čynam Fanar pazbavić Daniłaŭ manastyr mahčymaści śćviardžać, što jon lehitymizuje «raskolnikaŭ» z UPC KP i UAPC.

Nie vyklučana, što hałava novaj Carkvy va Ŭkrainie atrymaje, na hrecki ŭzor, tytuł archibiskupa. Tady jeparchijalnyja archirei buduć mitrapalitami i prosta biskupami. Naŭrad ci novaja Carkva atrymaje patryjarcha. Inšaje pytańnie — jakaja budzie heta aŭtakiefalija. Ci budzie novaja Carkva mieć prava miravareńnia? Naprykład, Pravasłaŭnaja Carkva Češskich Ziemlaŭ i Słavakii takoha prava nie maje, mira atrymlivaje z Kanstancinopala, ale źjaŭlajecca aŭtakiefalnaj i ahulnapryznanaj.

Kali taki scenar — stvareńnie novaj Carkvy va Ukrainie — ździejśnicca, dla jaje usieahulnaha pryznańnia spatrebicca praciahły čas, ale samaje važnaje pryznańnie — pryznańnie Kanstancinopalskaj Carkvy i Usialenskaha Patryjarcha — jana atrymaje. Kali taki scenar ździejśnicca, možna budzie skazać, što pazicyi jašče adnaho savieckaha instytuta, a mienavita RPC, buduć va Ukrainie istotna padarvanyja. Stvareńnie novaj Carkvy možna budzie paraŭnać z dekamunizacyjaj Ukrainy, bo RPC, što ni kažy, — pradukt kamunistyčnaha režymu. Istotna zvuzicca i «russkij mir», a sama RPC, hublajučy svaje pazicyi va Ukrainie, užo nie zmoža pretendavać na vyklučnuju rolu ŭ Pravasłaŭi.

Maskva — i Daniłaŭ manastyr, i Kreml — prykładuć maksimum namahańniaŭ, kab ukrainskaja aŭtakiefalija nie ździejśniłasia. I ŭsio ž budziem spadziavacca, što ŭ maskoŭskich kabinietach ustrymajucca ad krajnich mieraŭ u dačynieńni da Varfałamieja, pra jakija piša doktar Ludmiła Filipovič. Budziem spadziavacca, što antyimpieryjalistyčnuju ajčynnuju vajnu i ŭ Danbasie, i na pravasłaŭnaj arenie Ukraina vyjhraje. A vyjhraje Ukraina — vyjhraje i Biełaruś.

Čytajcie taksama: Maskva zaniepakojena krokami Kijeva da aŭtakiefalii, a Minsk znoŭ hublaje šanc

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?