Prosta padčas Alimpijady ŭ adstaŭku adpraŭleny ministr sportu Alaksandr Šamko. Łukašenka abvinavaciŭ jaho i ministra lasnoj haspadarki Michaiła Amieljanoviča ŭ «niepryniaćci antykarupcyjnych mieraŭ» u svaich viedamstvach. «Naša Niva» zhadvaje Alaksandra Šamko, jaki apošnija šeść hadoŭ uznačalvaŭ spartovuju śfieru krainy.

Alaksandr Šamko. Fota svaboda.org.

Alaksandr Šamko. Fota svaboda.org.

Z pažarnych — u spartsmieny

U Alaksandra Šamko vielmi niezvyčajnaja karjernaja linija. Ale kali Łukašenka skazaŭ «treba», to Šamko adkazaŭ «jość»!

Alaksandru Šamko 50 hadoŭ, jon minčuk. Skončyŭ politechničny technikum, paśla čaho słužyŭ u savieckim vojsku. Ad 1989 hoda Šamko ŭ sistemie MNS. Pracavaŭ zvyčajnym pažarnym na vulicy Siarova ŭ Minsku. Byŭ kamandziram adździaleńnia, načalnikam karavuła. Karaciej, prajšoŭ na pažarnaj słužbie samyja roznyja prystupki.

U 2007-m jaho pryznačajuć načalnikam dziaržaŭnaha pažarnaj avaryjna-vyratavalnaj ustanovy «Respublikanski atrad śpiecyjalnaha pryznačeńnia» MNS. A jašče praz hod Šamko stanovicca namieśnikam ministra MNS.

Adnak u 2012 hodzie Šamko atrymlivaje nadzvyčaj niečakanaje pryznačeńnie — ministram sportu. Jon tady pryjšoŭ u adnoj źviazcy z Maksimam Ryžankovym, jaki tady byŭ pamočnikam prezidenta pa pytańniach sportu, a ciapier źjaŭlajecca pieršym namieśnikam kiraŭnika Administracyi prezidenta.

U ministra adsudzili kvateru

Viasnoj 2014 hoda Alaksandr Šamko nabyŭ sabie čatyrochpakajoŭku pa vulicy Jankoŭskaha ŭ Minsku. Usio ž nie apošni čynoŭnik u krainie, moža sabie i dazvolić. Ale sprava była ŭ tym, što kvatera dastałasia ministru pa canie, mienšaj za rynkavuju. Sprava ŭ tym, što zabudoŭščyk «Manalithrad» mieŭ prablemy, časta ŭźvinčvaŭ ceny. Mnohija dolščyki admaŭlalisia dapłočvać. Tady «Manalithrad» razarvaŭ damovy ŭ adnabakovym paradku. A ŭ adnu z čatyrochpakajovak i ŭkłaŭ hrošy čynoŭnik.

Kvadratny mietr kaštavaŭ ministru $1134 u ekvivalencie, i heta była vyhadnaja ŭhoda. Bo pa Minsku siaredniaja cana tady składała $1650 za mietr. Adnak siamja, jakaja vałodała pieršasnymi pravami na kvateru, padała ŭ sud na zabudoŭščyka. Šamko źmiryŭsia sa strataj kvatery i nie praciahvaŭ sudovyja sprečki.

Šmatlikija dopinhavyja skanadały

Čym zapomniłasia kiravańnie Šamko biełaruskim sportam? Była samaja ŭdałaja zimovaja Alimpijada ŭ Sočy, dzie dziakujučy bliskučamu vystupu Darji Domračavaj (try zołata!), biełarusy zdabyli až šeść miedaloŭ. A voś na letnich Alimpijadach našy atlety vystupajuć usio horš.

U dašamkoŭskuju epochu, na Alimpijadzie ŭ Piekinie biełarusy byli 16-i ŭ ahulnym zaliku. U Łondanie — 26-i, a ŭ Rya-de-Žanejra — 40-i. U Brazilii biełarusy zdabyli tolki dzieviać miedaloŭ — heta najhoršy vynikam za časami niezaležnaści.

Svajoj dopinhavaj prahramy biełarusy, viadoma, nie majuć. Ale našy spartsmieny z zajzdrosnaj rehularnaściu traplajucca na takich skandałach. Za apošnija hady byli dyskvalifikavanyja kidalnik mołata Pavieł Kryvicki, ciažkaatlet Stanisłaŭ Čadovič, šturchalnica jadra Natalla Michnievič, ciažkaatletka Nastaśsia Novikava i mnohija inšyja.

Nie adramantavaŭ stadyjon «Dynama»

Pa słovach Šamko, za rekanstrukcyjaj stadyjona «Dynama» ŭ Minsku jon naziraje prosta z voknaŭ svajho pracoŭnaha kabinieta.

Stadyjon «Dynama» zakryli na rekanstrukcyju až u 2012. Płanavałasia, što da leta nastupnaha hoda jaho ŭžo ŭviaduć u ekspłuatacyju. Adnak na dvare ŭžo 2018, a pracy ŭsio jašče nie zavieršanyja. Takim čynam, ceły dvuchmiljonny horad zastaŭsia biez paŭnavartasnaha stadyjona, dzie, skažam, mahła b hulać nacyjanalnaja zbornaja pa futbole.

Narešcie, zdać abjekt płanujuć pad II Jeŭrapiejskija hulni, jakija projduć u Minsku ŭ 2019 hodzie. Heta darahoje spabornictva, ad jaho admoviłasia Hałandyja, a voś Biełaruś uziałasia.

Niadaŭna, kali žurnalist «Priessboła» spytaŭsia ŭ Šamko adnosna kazyrka, jaki nie da kanca zakryvaje ŭsich hledačoŭ ad daždžu, to Šamko prosta sarvaŭsia na jaho, maŭlaŭ, zajmajecca krytykanstvam. Ministerstva sportu pry Alaksandru Šamko było adnym z najbolš zakrytych viedamstvaŭ.

Chto moža pryjści na źmienu?

Novy ministr pakul nie pryznačany. Samy čas krychu pahadać na kavavaj huščy. Chto moža sieści ŭ ministerskaje kresła? Niekalki hadoŭ nazad uspaminałasia Natalla Piatkievič, ale małavierahodna, što byłaja top-čynoŭnica zaraz znoŭ vierniecca ŭ abojmu. Zastajecca pieršy namieśnik kiraŭnika Administracyi prezidenta Maksim Ryžankoŭ, dla jakoha sport — heta rodnaja śfiera. Moža być, para viarnuć u dziaržaŭnaje kiravańnie byłoha kiraŭnika Pamiežnaha kamiteta Ihara Račkoŭskaha. A jość jašče deputat-małatabojec Vadzim Dzieviatoŭski. Chacia ministram sportu moža akazacca čałaviek sa śfiery, zusim dalokaj da sportu, sam Šamko heta cudoŭna dakazaŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?