Siarhiej Bašmur. Fota gomel.today.

Siarhiej Bašmur. Fota gomel.today.

Apošniaj kroplaj stała admova Śledčaha kamiteta ŭ zaviadzieńni kryminalnaj spravy. Śmierć ustanoŭlena, a vinavatych niama — mienavita heta prymusiła Siarhieja vyjści na pikiet.

Letam minułaha hoda ŭ Homielskaj abłasnoj radzilni na šosty dzień pamior novanarodžany syn Siarhieja i Taćciany. Miedycynskaje zaklučeńnie — niavyznačanaja ŭnutryčeraŭnaja infiekcyja. Baćki zapatrabavali raźbiralnictvaŭ. Pa vynikach ekśpiertyzy Śledčy kamitet nie znajšoŭ padstaŭ dla padaŭžeńnia rasśledavańnia i ŭzbudžeńnia kryminalnaj spravy. Siarhiej padavaŭ zajavu ŭ Homielski haradski vykanaŭčy kamitet na praviadzieńnie adzinočnaha pikietu. Adnak jamu pryjšoŭ admoŭny adkaz.

Siońnia jon vyjšaŭ, kab raspavieści ludziam pra svaju prablemu i pra biaździejnaść haradskich uładaŭ. Razam ź nieabyjakavymi ludźmi Siarhiej choča damahčysia adkrytaści i hałosnaści ŭ miedycynie.

«Ja asabista sutyknuŭsia z tym, što dakazać vinu z boku miedykaŭ praktyčna niemahčyma. Śledstva pa rasśledavańni spraŭ, źviazanych ź miedycynskimi vypadkami, padobnymi na moj, praktyčna niama. Śledčy źbiraje infarmacyju, apytvajučy tych miedrabotnikaŭ, jakija mieli dačynieńnie da lačebnaha pracesu. Usie ŭ adzin hołas śćviardžajuć: rabili ŭsio zhodna z pratakołam. Zabirajecca ŭsia dakumientacyja, u jakoj usio ŭžo dobra napisana. Ja chaču viedać ad samaha pačatku, što adbyvajecca ź dziciom, kali jaho adryvajuć ad hrudziej maci: jakija pryščepki jamu robiać, ci naležnym čynam sočać za zdaroŭjem novanarodžanaha», — tłumačyć Siarhiej.

Pakul Siarhiej atrymlivaje tolki adpiski. Da hetaha času nichto nie moža rastłumačyć jamu, adkul uziałasia unutryčeraŭnaja infiekcyja i chto vinavaty ŭ śmierci syna.

«Ja nie źbirajusia siadzieć na miescy. Chaču, kab haradskija ŭłady naviali paradak u radzilniach, špitalach, paliklinikach. Čamu takoje staŭleńnie da nas, da prostych ludziej? Čamu zamiest akazańnia psichałahičnaj dapamohi majoj žoncy, vypisali na ŭsie čatyry baki biez rekamiendacyj? Ja ŭžo jaki miesiac sprabuju dabicca praŭdy, daviedacca, ad čaho kankretna pamierła majo dzicia i jak heta praduchilić u dalejšym. Ale lekary pa-raniejšamu nie mohuć vyrazna pastavić dyjahnaz. Kali z takimi prablemami nie razabracca ciapier, to luby zmoža apynucca na našym miescy, — kaža Siarhiej. — Ja napisaŭ u Śledčy kamitet ab adnaŭleńni pravierki pa našaj spravie. Čakaju adkaz. Kali mnie admoviać, to budu iści dalej. Chaču, kab kiraŭnictva našaj krainy mianie pačuła i narešcie naviało paradak u našym rehijonie, pakolki miascovyja čynoŭniki nie ŭ stanie heta zrabić».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?