Anhličanin italjanskaha pachodžańnia, jaki daŭno viadzie biznes u Rasiei i Biełarusi, abvinavačvajecca śledčymi maskoŭskaj palicyi ŭ kradziažy bujnoj sumy ŭ svajho partniora, biznesoŭca z Šviejcaryi, pry ŭźviadzieńni vyšynnaha kompleksa ŭ Minsku, pieradaje ej.by. 

Sam brytaniec vinu kateharyčna nie pryznaje, śćviardžajučy, što jaho kanflikt z kampańjonam adnosicca da śfiery hramadzianska-pravavych adnosin.

Pa dadzienych krynic «Kommiersanta», kryminalnaja sprava ab machlarstvie ŭ asabliva bujnym pamiery ŭ dačynieńni da brytanskaha biznesmena Vincenta Pietryła była raspačata śledčaj častkaj UUS Centralnaj akruhi Maskvy. Nahodaj stała zajava byłoha partniora spadara Pietryła — bujnoha pradprymalnika i inviestara z Šviejcaryi Hiercharda Amona, jaki asabista pryjazdžaŭ u stalicu Rasii, kab paskardzicca ŭ pravaachoŭnyja orhany. Pa viersii zajaŭnika, brytaniec vykraŭ u jaho bolš za 300 tys. dalaraŭ.

Vincent Pietryła daŭno zajmajecca biznesam u krainach postsavieckaj prastory. U 2010 hodzie jon razam z Hierchardam Amonam udzielničaŭ u ambicyjnym prajekcie ŭ Biełarusi. Havorka išła ab pabudovie 25-paviarchovaha vyšynaha (100 mietraŭ vyšynioj) biznes-centra Futuris na skryžavańni Minskaj kalcavoj aŭtadarohi i praśpiekta Niezaležnaści. Płanavałasia, što šviejcarac układzie da 70 młn dalaraŭ u prajekt, jaki mieŭ na ŭvazie budaŭnictva bolš čym 45 tys. mietraŭ ofisnych i handlovych płoščaŭ dla raźmiaščeńnia da 1300 čałaviek. Vincent Pietryła adkazvaŭ za techničnuju častku prajekta i pryciahnieńnie inviestycyj.

U kancy 2010 hoda Vincent Pietryła i Hierchard Amon va ŭračystaj abstanoŭcy ŭdzielničali ŭ prysutnaści vysokapastaŭlenych biełaruskich čynoŭnikaŭ u zakładcy kapsuły ŭ padmurak budučaha centra.

Adnak užo praz hod pamiž partniorami ŭźnikli roznahałośsi. Pa niekatorych dadzienych, spadar Amon byŭ niezadavoleny tym, jak vydatkoŭvajucca vydzielenyja im srodki, i spyniŭ finansavańnie, što pryviało da zamarozki budaŭnictva. Bolš za toje, jon zapatrabavaŭ ad Vincenta Pietryła viarnuć jamu častku hrošaj, abvinavaciŭšy partniora ŭ nieabhruntavanym uzbahačeńni. Anhličanin z takoj traktoŭkaj nie pahadziŭsia, zajaviŭšy, što ŭjaho prosta sprabujuć adabrać biznes. Paśla hetaha pamiž imi pačalisia ciažby, u tym liku i ŭ maskoŭskich sudach. Rasijskaje pravasudździe, darečy, stała na bok brytanca, admoviŭšy jaho partnioru ŭ zadavalnieńni pazovu.

Treba adznačyć, što skandały pieraśledvali Futuris jašče da kanfliktu partnioraŭ. Pa pieršapačatkovych płanach, biznes-centr pavinien byŭ nazyvacca «Załaty horad», a da jaho budaŭnictva Vinsent Pietryła pryciahvaŭ piaciarych biełaruskich kamiersantaŭ i čynoŭnikaŭ. Adnak nieŭzabavie jon abvinavaciŭ ich u sprobie vykraści ŭ jaho 3 młn jeŭra. Partniory byli aryštavanyja, a ŭ 2010 hodzie asudžanyja na terminy ad šaści da dzieviaci hadoŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0