Ułady Biełarusi apaviaścili avijakampaniju «Azierbajdžanskija avijalinii» (AZAL) ab mahčymaści prypynieńnia z 15 krasavika palotaŭ pamiž Minskam i Baku z-za niezadavolenaści lhotnaj taryfnaj palitykaj AZAL, paviedamlaje partał biźnies-infarmacyi ABC.az.

Pavodle słoŭ vice-prezidenta AZAL i dyrektara Dziaržaŭnaj administracyi hramadzianskaj avijacyi Aryfa Mamiedava, svaje pretenzii biełaruski bok patłumačyŭ tym, što azierbajdžanskaje ZAT źniziła košt avijabiletaŭ va ŭron kankurujučamu avijapieravozčyku (avijakampanii «Biełavija»).

«U Biełarusi adznačyli, što pry ŭstanoŭcy nizkich cen na avijabilety treba atrymać zhodu i procilehłaha boku. Kali pytańnie nie vyrašycca ŭ najbližejšy čas, to Biełaruś prypynić paloty. Dumaju, što, kali jany buduć nastojvać na padaražańni biletaŭ abo prypynieńni palotaŭ, my pojdziem ź imi na kampramis», — zajaviŭ Mamiedaŭ.

Jon paviedamiŭ, što dla vyrašeńnia prablemy AZAL apieratyŭna nakiruje zvarot u pasolstva Biełarusi ŭ Azierbajdžanie i azierbajdžana-biełaruskuju sumiesnuju kamisiju.

«My zaprašajem biełaruski bok na pieramovy z metaj najchutčejšaha vyrašeńnia pytańnia», — skazaŭ vice-prezident AZAL.

Ciapier paloty ŭ Minsk vykonvajucca «Azierbajdžanskimi avijalinijami» pad nizkabiudžetnym brendam AZALJET. Avijakampanija pačała paloty pad hetaj handlovaj markaj 28 sakavika 2016 hoda. Adnoj z metaŭ častkovaha pierachodu na łaŭkost-madel stała imknieńnie skłaści kankurencyju zamiežnym nizkataryfnym apierataram, jakija vykazvajuć cikavaść da Azierbajdžana.

Jak havorycca ŭ paviedamleńni AZAL, pad brendam AZALJET buduć vykonvacca rejsy pa najbolš zapatrabavanych kirunkach i praciahłaściu da troch z pałovaj hadzin. Siudy adnosiacca rejsy ŭ takija harady, jak Maskva, Stambuł, Dubaj, Tbilisi, Sankt-Pieciarburh, Minsk, Kijeŭ, Lvoŭ, Tehieran, Ankara, tureckija kurorty Antalija, Iźmir, Badrum i Dałaman i šerah inšych haradoŭ.

Košt avijabileta na rejsy AZALJET u adnym kirunku składzie ad 49 jeŭra pry vylecie z/u Baku pa lubym z vyšejzhadanych kirunkaŭ, tudy-nazad — ad 98 jeŭra. U hety košt uvachodziać usie padatki i zbory.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?