U śviata Vadochryšča ŭ Viciebsku pradavali butylavanuju śviatuju vadu pa košcie ad 10 000 da 20 000 rubloŭ za paŭtaralitrovuju butelku, niahledziačy na toje, što ŭ 2015 hodzie mitrapalit Pavieł vystupiŭ z asudžeńniem takoha handlu.

Na ŭmovach ananimnaści adzin ź viciebskich śviataroŭ, aburany tym, što, pavodle jaho słoŭ, parušajecca ŭkazańnie mitrapalita, paviedamiŭ karespandentu «Narodnych navin Viciebska», što kala haradskich chramaŭ handlujuć śviatoj vadoj i prasiŭ apublikavać hety fakt.

Spačatku vydańnie vyrašyła pierakanacca, što mitrapalit Pavieł na samaj spravie zabaraniaŭ pradavać śviatuju vadu. Akazałasia, što hod tamu jon sapraŭdy dastatkova adnaznačna vykazaŭsia adnosna takoj praktyki:

«Prodaž śviatoj vady — vy viedajecie, heta nonsens. Heta prosta hłupstva. Kali vy sapraŭdy chočacie ludziam dapamahčy, to zabarony ŭ hetym niama, ale śviatuju vadu pradavać… Kali ja daviedajusia, to budu hetych handlaroŭ karać», — pryvodzić słovy ijerarcha ahienctva Interfaks.

Zatym karespandent «NNV» pabyvaŭ u pravasłaŭnych cerkvaŭ u centry horada i pierakanaŭsia, što tut sapraŭdy možna było kupić aśviačonuju vadu ŭ płastykavych butelkach pa 1,5 litra.

U kijosku z abrazami i śviečkami la Śviata-Uśpienskaha sabora vada pradavałasia ŭ butelkach z karyčnievaha płastyka bieź jakich-niebudź nalepak, i kaštavała 10 000 rubloŭ.

Kala Vaskrasienskaj carkvy kala ratušy stajała pałatka, u jakoj pradavałasia tolki śviataja vada ŭ prazrystych płastykavych butelkach z malaŭničaj etykietkaj. Tut jana ŭžo kaštavała 20 000 rubloŭ. Hrošy za vadu pradaviec składaŭ u asobnuju skrynku, pobač z butelkami stajała «skarbonka», kudy možna było zrabić achviaravańnie.

Handlavali śviatoj vadoj i la Błahavieščanskaj carkvy, taksama pa 20 000 rubloŭ. Adnak tut, u adroźnieńnie ad Vaskrasienskaj carkvy, stajała aŭtacysterna i bočka z kranami, adkul achvotnyja mahli nabirać vadu ŭ svoj posud. Karespandent pacikaviŭsia ŭ žančyny, jakaja handlavała, ci viedaje jana pra abiacańnie mitrapalita karać za prodaž aśviačonaj vady, na što taja adkazała: «A vy ad mitrapalita? Nie? Nu i ŭsio, da pabačeńnia!»

Z čyjho błasłavieńnia idzie taki handal, surazmoŭca taksama doŭha nie chacieła adkazvać, choć tajamnicy ŭ hetym asablivaj niama. Na etykietkach z vyjavaj Błahavieščanskaj carkvy pakazana, što śviataja vada, aśviečanaja na śviata Bohajaŭleńnia, vyrablenaja pa błasłavieńni archijepiskapa Viciebskaha i Aršanskaha Dzimitryja, a srodki ad prodažu iduć na carkoŭnyja patreby.

Na biełaruskich carkoŭnych sajtach jakoj-niebudź infarmacyi ab prodažy śviatoj vady znajści nie ŭdałosia. Što tyčycca resursaŭ RPC naohuł, to hetaja tema tam abmiarkoŭvałasia nieadnarazova. Prychilniki dazvołu takoha handlu pryvodziać dva arhumienty: albo heta zusim nie prodaž, a achviaravańnie, albo heta prosta pakryćcio vydatkaŭ na butylavańnie vady biez atrymańnia jakoha-niebudź prybytku.

U vypadku achviaravańnia dziŭnym vyhladaje toje, što achviaradaŭca atrymlivaje butelku, tolki pieradaŭšy abumoŭlenuju sumu, a hrošy paśla hetaha traplajuć nie ŭ ahulnuju achviarnuju skryniu, a ŭ asobnuju kasu.

Što ž tyčycca kampiensacyi vydatkaŭ, to tut treba ličyć. Tak, u bližejšaj kramie raźliŭnoha piva karespandentu skazali, što paŭtaralitrovuju butelku z korkam u roźnicu možna kupić za 2000 rubloŭ. Takim čynam, pry košcie butelki śviatoj vady ŭ 10 000 rubloŭ, 2000 sychodziać na apłatu tary, a jašče 8000 na što? Na samu raźliŭku vady pa butelkach? Ciapier biarem butelki z błasłavieńniem archijepiskapa pa 20 000 rubloŭ: raz butelka śviatoj vady biez etykietki kaštuje 10 000 rubloŭ, značyć jašče 10 000 rubloŭ syšli na palihrafiju, bo samo błasłavieńnie, naturalna, biaspłatnaje? Pry hetym paŭtaralitrovaja butelka biełaruskaj pitnoj vady kaštuje ŭ roźnicu 7200 rubloŭ. Ci nie vyhadniej było kupić adrazu ŭ butelkach, i ŭžo zatym ich aśviacić?..

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?