Pradstaŭniki maładziečanskich uładaŭ 21 studzieni sami pryjšli na sustreču z pradprymalnikami, praduchiliŭšy ich šeście da rajvykankama.

Indyvidualnyja pradprymalniki Maładziečna i čynoŭniki rajvykankama abmierkavali nastupstvy ŭvachodžańnia ŭ dziejańnie prezidenckich ukazaŭ № 222 i 48, jakija rehłamientujuć dziejnaść IP, u budynku handlova-administracyjnaha centra «Modul».

Raniej mierkavałasia, što IP źbiarucca kala «Modula» i projduć pa centralnaj vulicy Maładziečna, kab pieradać svaje patrabavańni ŭ rajvykankam.

«Vidać, pajšła ŭstanoŭka hasić abureńnie pradprymalnikaŭ na apiaredžańnie, kab nie jany išli ŭ vykankamy, a kab čynoŭniki sami vyjazdžali da miescaŭ dysłakacyi IP», — zajaviŭ staršynia Abjadnanaj hramadzianskaj partyi Anatol Labiedźka.

Palityk siońnia ździejśniŭ pajezdku ŭ Maładziečna sa svaimi partniorami pa pravacentrysckaj kaalicyi — pieršym namieśnikam staršyni ruchu «Za Svabodu» Jurasiom Hubarevičam i sustaršynioj arhkamiteta pa stvareńni partyi «Biełaruskaja chryścijanskaja demakratyja» Vitalem Rymašeŭskim. Jany naviedali rečavy rynak, pieradali zvarot u rajvykankam z prapanovaj pravieści kruhły stoł pa prablemie karupcyi ŭ rehijonie, a taksama płanavali pryniać udzieł u šeści pradprymalnikaŭ.

U vyniku IP pahutaryli z pradstaŭnikami rajvykankama ŭ budynku handlovaha centra. Na sustrečy čynoŭniki prapanavali pradprymalnikam vykłaści pretenzii i prapanovy na papiery i pieradać ich u vykankam. «Takija sustrečy pradprymalnikaŭ z čynoŭnikami zvyčajna skančajucca ničym. Heta razmova hłuchaniamoha i ślapoha, jany razmaŭlajuć na roznych movach. Mnie było važna pahladzieć, jak usio heta adbyvajecca na miescach», — skazaŭ Labiedźka.

Pradprymalniki damahajucca skasavańnia ukazaŭ № 222 «Ab rehulavańni pradprymalnickaj dziejnaści i realizacyi tavaraŭ indyvidualnymi pradprymalnikami i inšymi fizičnymi asobami», jaki ŭvajšoŭ u siłu 1 studzienia, i № 48 «Ab mierach pa zabieśpiačeńni dziaržaŭnaha kantrolu (nahladu) za vykanańniem patrabavańniaŭ techničnych rehłamientaŭ». Hetyja dakumienty, jak śćviardžajuć IP, paralizavali ich pracu.

Kamientujučy pajezdku ŭ Maładziečna, Juraś Hubarevič adznačyŭ, što situacyja tam padobnaja na toje, što zaraz adbyvajecca ŭ inšych haradach Biełarusi. «Na rynkach nie pracuje 90% indyvidualnych pradprymalnikaŭ», — padkreśliŭ jon. Palityk ličyć, što situacyja ź IP stvoryć napružańnie na rynku pracy i udaryć pa kišeni hramadzian, jakija pryvykli kuplać tannyja rečy.

U svaju čarhu Vital Rymašeŭski adznačyŭ, što padčas pajezdak pa rehijonach jany chočuć ubačyć, što ŭ realnaści adbyvajecca ŭ haradach Biełarusi, daviedacca ab prablemach pradprymalnikaŭ i ich bačańnie vyjścia ź situacyi. Palityk ličyć, što biełaruskaja apazicyja pavinna imknucca abjadnać nacyju ŭ baraćbie za hodnaje žyćcio. Pavodle jaho słoŭ, vyrašyć sacyjalnyja prablemy bieź ich palityzacyi siońnia niemahčyma. Rymašeŭski nazvaŭ pamyłkaj stratehiju tych lidaraŭ pradprymalnikaŭ, jakija «vyvodzili svaje patrabavańni z palityčnaj płoskaści».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?