Niezaležnyja studenckija arhanizacyi vystupili z zajavaj, u jakoj zaklikajuć administracyju BDU i Minadukacyi vykazać prychilnaść akademičnym svabodam i ŭstrymacca ad lubych dyscyplinarnych pakarańniaŭ studentaŭ-aktyvistaŭ.

Zajava pryniataja Kampanijaj pa manitorynhu nacisku na studentaŭ Student Watch, u jakuju ŭvachodziać «Centr raźvićcia studenckich inicyjatyŭ» (ustanova «HIEDIEVS»), «Bractva arhanizataraŭ studenckaha samakiravańnia» (ustanova «Studenckaja fabryka dumki»), Moładzievaaja prafsajuznaja hrupa «Studenckaja Rada» i «Zadzinočańnie biełaruskich studentaŭ». 

U zajavie adznačajecca, što 3 śniežnia administracyja fiłałahičnaha fakulteta BDU vyklikała na kamisiju studenta fiłałahičnaha fakulteta BDU Hleba Vajkula, jaki ŭdzielničaŭ u Maršy studentaŭ, što adbyŭsia 2 śniežnia ŭ Minsku. 

«Aficyjnaja pryčyna vykliku Hleba — najaŭnaść propuskaŭ, adnak my razhladajem heta jak nacisk na studenta z-za jaho ŭdziełu ŭ akcyi pratestu. My, niezaležnyja studenckija arhanizacyi, ličym elemientam nacisku dyscyplinarnyja spahnańni luboha charaktaru «de-jure» za propuski zaniatkaŭ, ale «de-fakta» — za vykazvańnie studentami ŭłasnaha mierkavańnia i hramadskuju aktyŭnaść u miežach univiersiteta. Takija dziejańni źjaŭlajucca pramym parušeńniem asnoŭnych pryncypaŭ Jeŭrapiejskaj prastory vyšejšaj adukacyi i abmiežavańniaŭ akademičnych svabod», — padkreślivajecca ŭ zajavie. 

Niezaležnyja studenckija arhanizacyi majuć namier u miežach zajaŭlenaha raniej manitorynhu źbirać, analizavać i publikavać infarmacyju pra ŭsie fakty nacisku na studentaŭ u suviazi ź ich hramadzianskaj aktyŭnaściu, udziełam u ruchu «Studenty suprać» i inšych parušeńniach akademičnych svabod. 

«My vitajem dziejańni administracyi fiłałahičnaha fakulteta BDU, členaŭ kamisii i ŭsiu administracyju BDU, jakija ŭstrymalisia ad žorstkaha dyscyplinarnaha pakarańnia ŭ dačynieńni da studenta BDU Hleba Vajkula. My ščyra spadziajomsia, što administracyja BDU, inšych VNU Minska i Biełarusi, a taksama Ministerstva adukacyi Respubliki Biełaruś vykaža prychilnaść akademičnym svabodam i ŭstrymajecca ad lubych dyscyplinarnych pakarańniaŭ studentaŭ-aktyvistaŭ», — havorycca ŭ zajavie. 

Dniom 2 śniežnia ŭ rajonie staličnaj płoščy Niezaležnaści prajšoŭ studencki marš «Luboŭ i spraviadlivaść», arhanizavany rucham «Studenty suprać». Svajoj akcyjaj studenty chacieli damahčysia ad kiraŭnictva BDU «admieny płatnych pierazdač i adpracovak», «spynieńnia nacisku na studentaŭ», «rospusku Asamblei BDU i stvareńnia novaha orhana studenckaha samakiravańnia». 

Na nastupny dzień student fiłałahičnaha fakulteta BDU Hleb Vajkul, jaki ŭdzielničaŭ u studenckim maršy, atrymaŭ vusnaje papiaredžańnie dekanata za propuski zaniatkaŭ. Takoje rašeńnie na svaim pasiadžeńni pryniali členy niadaŭna stvoranaj u VNU kamisii pa propuskach zaniatkaŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?