Hrečaskija archieołahi dapuskajuć, što pad uzhorkam Kasta ŭ horadzie Amfipol na poŭnačy Hrecyi mahčyma zachoŭvajecca mahiła Alaksandra Makiedonskaha.

Pra heta zajaviła kiraŭnik archieałahičnych raskopak Kaciaryna Pierystery (Katerina Peristeri), pradstaŭlajučy ŭ subotu ŭ Ministerstvie Kultury Hrecyi vyniki raskopak 2012—2014 hh. Dakład vyklikaŭ vialikuju cikavaść — aktavaja zała Minkultury byŭ pierapoŭnienaja, abmierkavańnie doŭžyłasia 4,5 hadziny, choć pieršapačatkova forma sustrečy navat nie praduhledžvała pytańniaŭ da archieołahaŭ.

Pachavańnie ŭ Amfipoli nazyvajuć najbujniejšym archieałahičnym adkryćciom apošnich dziesiacihodździaŭ —

pachavalny kompleks dyjamietram 158,4 mietra abniesieny marmurovaj ścianoj daŭžynioj 497 mietraŭ, u pachavańni znojdzienyja mazaika, skulptury śfinksaŭ, karyjatydy. 

Raskopki tut viaducca z 2012 hoda, adnak ŭ žniŭni, kali akazaŭsia zrazumieły maštab pachavańnia, da ich prykavana ŭvaha hramadstva ŭsioj Hrecyi.

Znachodki

«Heta važnaje archieałahičnaje miesca viadomaje z 1950—1960-ch hadoŭ. My pačynali ŭ 2012 hodzie, miascovyja žychary kazali, što tut carskaje pachavańnie», — skazała Pierystery.

Jana raspaviała, što na praciahu dvuch hadoŭ archieołahi viali raskopki navakolnaj ściany, a sioleta pačali raboty ŭ pachavańni — pastupova ačyścili ad piasku i ziamli try ŭnutranych pamiaškańni pachavańnia, znajšli śfinksaŭ, karyjatydy, unikalnuju mazaiku z vyjavaj sceny vykradańnia Pasiejdonam Piersiefony, dzie prysutničaje Hiermies, jaki supravadžaje ich na svajoj kalaśnicy. «Hetyja tvory sapraŭdy ŭražvajuć», — adznačyła archieołah.

U vyniku ŭ chodzie raskopak byŭ znojdzieny škilet, jaki pieradadzieny dla daśledavańnia antrapołaham.

Pavodle Pierystery, letam jana raspaviała ab unikalnaj znachodcy premjer-ministru Antonisu Samarasu. «Samaras zrazumieŭ važnaść pomnika i zabiaśpiečyŭ miery pa jaho achovie», — adznačyła kiraŭnica raskopak.

Archieołahi datujuć pachavańnie apošniaj čverciu IV stahodździa da našaj ery, razam z tym u pachavańni znojdzienyja maniety troch pieryjadaŭ — z vyjavaj Alaksandra IV st. da n. e., II st. da n. e. i III st. n. e.

Pierystery ŭ chodzie dakładu pakazała fatahrafii tolki častki znachodak. Prysutnyja navukoŭcy zapatrabavali, adnak, pakazać fatahrafii škileta.

«Fotazdymkaŭ niama», — zajaviła Pierystery, vyklikaŭšy burnaje abureńnie častki navukoŭcaŭ.

«Vy što, nie fiksavali jak jon raźmieščany? Jak heta mahčyma?», — zajaviła adna z archieołahaŭ.

U rešcie rešt Pierystery ŭsio ž taki pakazała dva zdymki kostak ŭ ziamli, ale što-niebudź vyznačyć pa ich, na dumku śpiecyjalistaŭ, niemahčyma.

U chodzie dyskusii vyśvietliłasia, što byŭ znojdzieny čerap. A na pytańnie, ci byli znojdzienyja usie častki škileta, kiraŭnica raskopak adkazvać nie stała.

U vyniku ŭmiašałasia hienieralny sakratar Minkultury Lina Miendoni, jana rastłumačyła, što cełasnaść škileta była «parušanaja», čerap znachodziŭsia pobač z sarkafaham, byli znojdzienyja inšyja kostki, ale vyznačyć, kamu naležyć škilet — mužčynu abo žančynie — archieołahi nie mohuć, i treba, kab pareštki vyvučyli śpiecyjalisty.

Akramia hetaha vyśvietliłasia, što ŭ pachavańni znojdzienaja i kieramika, što dazvalaje davoli dakładna datavać znachodku, adnak fatahrafii kieramiki taksama nie byli pradstaŭlenyja.

Zbroi ŭ pachavańni nie było, ale, jak ličać archieołahi jaje mahli vykraści rabaŭniki mahił, pakolki byli vyjaŭlenyja tolki častki ščyta.

Navukoŭcy zajavili, što niezadavolenyja tym, što im nie dajuć poŭnaj infarmacyi i, na ich dumku, chavajuć unikalnyja znachodki.

Kiraŭnica raskopak pryznała, što pad uzhorkam mohuć być i inšyja pachavańni.

«Zavieršanaje daśledavańnie mienavita dadzienaha pachavańnia. Ja nie vyklučaju, što my ŭpuścili niešta. Pomnik maje i inšyja elemienty, ciapier tolki pačalisia ich hieafizičnyja daśledavańni», — zajaviła Pierystery, na dumku jakoj, ich vyniki buduć hatovyja praz dva-try miesiaca.

Chto?

Hałoŭnaje pytańnie, jakoje chvalavała ŭsich, — chto pachavany ŭ Amfipoli?

Pierystery kateharyčna admoviłasia nazvać jakija-niebudź imiony i ahučyć viersii, ale skazała, što pakul ničoha nielha vyklučyć.

«My nie viedajem navat chto mienavita — mužčyna abo žančyna — pachavany tut», — skazała jana. Pierystery nie vyklučyła, što heta mahiła viadomaha pałkavodca. «Leŭ na viaršyni i taki vializny pomnik śviedčać, što tut moža być pachavany vojenačalnik. Ja nie kažu pra teoryi, što tut moža być pachavany Alaksandr Vialiki», — skazała Pierystery.

Na pytańnie, ci nie pachavany tut chto-niebudź z členaŭ siamji Alaksandra Makiedonskaha abo navat sam Alaksandr Vialiki, jana adkazała: «Ničoha nielha vyklučyć i ničoha nielha skazać z upeŭnienaściu».

Raniej źjaŭlalisia paviedamleńni, što niabožčyk nie byŭ zabalzamavany. Heta vyklučała viersiju, što pareštki naležać Alaksandru Makiedonskamu, jaki pamior u Jehipcie. Adnak, u toj ža čas, pavodle słovaŭ udzielnikaŭ kanfierencyi, daśledavańni škileta jašče nie pačalisia.

Archieołahi pakul nie mohuć nazvać i aŭtara manumientalnaha zbudavańnia.

Na ich dumku, aŭtaraŭ mahło być niekalki. Što tyčycca viadomaha architektara i skulptara Dynakrata, jaki žyŭ u čas praŭleńnia Alaksandra Makiedonskaha, to jon tvaryŭ u Aleksandryi i naŭrad ci maje dačynieńnie da hetaha pomnika, zajavili navukoŭcy.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?