Biełaruski biznes aktyŭna abmiarkoŭvaje navinu ab mahčymym stvareńni instytuta śpiecimparcioraŭ niekatorych katehoryj tavaraŭ.

Pakul samoha prajekta ŭkaza prezidenta niama ŭ ahulnym dostupie, adnak pavodle papiaredniaj infarmacyi ŭrad vyznačyŭ 12 dziaržpradpryjemstvaŭ, jakim z 1 lipienia 2014 hoda pa 1 studzienia 2015 hoda dajecca vyklučnaje prava impartu radyjo-, tele-, videa- i bytavoj techniki, padšypnikaŭ, ruchavikoŭ, sielhastechniki, hruzavych aŭtamabilaŭ, stankoŭ, uboračnaj techniki, liftaŭ, šyn, elektronnych kampanientaŭ.

Učora ž premjer-ministr Biełarusi Michaił Miaśnikovič zajaviŭ u čas naviedvańnia AAT «Trykatažhandal», što aptymalnyja suadnosiny biełaruskich i impartnych tavaraŭ — 85 da 15 pracentaŭ, čym jašče bolš zapeŭniŭ u płanach urada zarehulavać patoki impartu.

Staršynia hramadskaha abjadnańnia pradprymalnikaŭ Anatol Šumčanka ličyć takija miery «antypradprymalnickimi i antyekanamičnymi»:

«Takija zachady nie pryviaduć ni da čaho dobraha, akramia jak asłabiać našuju krainu. Kali raniej miljard dalaraŭ vyvozili ŭ Jeŭrasajuz, dyk ciapier dziesiać vyviazuć u Rasiju. Ludzi nie admoviacca ad tannych tavaraŭ. Stvareńnie śpiecimparcioraŭ vyhadna krainam, u jakija my možam svabodna jeździć, to bok Rasii.

Nie viedaju, jakim miescam dumaje naš urad, kali prymaje takija rašeńni. U mianie jość prapanova našym čynoŭnikam u źviazku z učorašniaj zajavaj Miaśnikoviča pra 15%: najpierš pačnicie ź siabie. Pierasiadźcie na ajčynnyja aŭtamabili, karystajciesia biełaruskaj technikaj, nasicie biełaruskaje adzieńnie. Tady my ŭbačym ich patryjatyzm.

A pakul heta šlach da izalacyi, da žaleznaj zasłony».

Šumčanka taksama dapuskaje, što ŭśled za pryniaćciem ukaza ab śpiecimparciorach možna čakać inšych krokaŭ, nakiravanych na źmianšeńnie patoku impartu:

«Heta stanie praciaham apieracyi pa abmiežavańni impartu i vyvazu valuty. Buduć błakavacca važnyja arteryi dastaŭki impartnych tavaraŭ. Ja mahu skazać, što ŭžo siońnia heta pracuje.

Niadaŭna byŭ vypadak, kali pradprymalniki jechali ad polskaj miažy, i ich mašyny spyniali ŭ Hrodzienskaj i Bresckaj vobłaści, pierapisvali dadzienyja, hladzieli, što viazuć. Tamu razam z ukazam budzie i kamanda rehulavać patoki impartu na miažy.

Ale pieraškadžać hetamu nie treba. Heta ciažka, ale ja chacieŭ by, kab biełarusy pabačyli, chto imi kiruje i jakim čynam prymajucca rašeńni. Naš urad pracuje lepš za lubuju apazicyju. Ciažka padkłaści bolšuju śvińniu Łukašenku za tuju, jakuju jamu padkładvaje ŭrad».

 Imparciory ŭ čakańni

Bujnyja firmy-imparciory elektroniki i bytavoj techniki ŭstryvožanyja mahčymym pryniaćciem ukaza ab śpiecimparciorach, ale kamientavać rašeńnie ŭrada nie chočuć.

«My čytali naviny i čuli pra prajekt ukaza, abmiarkoŭvali. Adnak pakul kazać niešta biessensoŭna, tamu što niama dakumienta, jaki možna detalna razhledzieć», — patłumačyŭ Pavał Matusievič, namieśnik kiraŭnika TAA «Tryavist», jakomu naležyć internet-krama 21vek.

«U tym vyhladzie, u jakim prajekt ukaza abmiarkoŭvajecca siońnia ŭ Saŭminie, jon značna paharšaje ŭmovy pracy imparcioraŭ. My spadziajemsia, što jaho prymuć u inšym vyhladzie, jaki nie zakranie imparcioraŭ», — paviedamili «NN» u kampanii «Techna Miedya Trejd», jakaja vałodaje sietkaj kramaŭ «Techna Plus».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?