Pieršaja vytvorčaść u Kitajska-biełaruskim industryjalnym parku źjavicca ŭ 2015 hodzie. Ab hetym zajaviŭ žurnalistam vice-premjer Anatol Tozik pierad cyrymonijaj zakładki pieršaha kamienia parku, što adbudziecca siońnia kala vioski Bykačyna Smalavickaha rajona.

«Siońnia pačniecca budaŭnictva ŭnutranaj infrastruktury na terytoryi parku, — skazaŭ Anatol Tozik. — Važna pačać realnaje budaŭnictva. Spadziajusia, u hetym hodzie jano startuje». Vice-premjer vykazaŭ upeŭnienaść u tym, što prablem z rezidentami nie budzie: u partfieli vielmi šmat prapanoŭ. «Sumiesna z kitajskimi partniorami my stvarajem umovy dla prychodu siudy kampanij z supiersučasnymi technałohijami z roznych krain», — skazaŭ jon.

Anatol Tozik padkreśliŭ, što ab žadańni stać rezidentami parku zajaŭlajuć nie tolki kitajskija kampanii, ale i tajvańskija, paŭdniovakarejskija, japonskija, jeŭrapiejskija. «Park stvarajecca pad technałohii zaŭtrašniaha dnia», — dadaŭ vice-premjer.

Namieśnik kiraŭnika biełaruskaha ŭrada vykazaŭ nadzieju, što ŭ Kitajska-biełaruskim industryjalnym parku budzie farmiravacca novaja ekanomika Biełarusi.

Umovy dla rezidentaŭ parku vielmi vyhadnyja: pieršyja 10 hadoŭ padatki nie spahaniajucca naohuł, nastupnyja 10 hadoŭ — 50 pracentaŭ. Jon padkreśliŭ, što park raźmiaščajecca ŭ supiervyhadnym miescy z punktu hledžańnia łahistyki: u niepasrednaj blizkaści ad mižnarodnaha aeraporta, čyhunačnych puciej, transnacyjanalnaj aŭtamabilnaj mahistrali Bierlin - Maskva.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?