U niadzielu, 15 červienia, va Ukrainie abjaŭleny dzień žałoby pa vajennych i pamiežnikach, jakija zahinuli siońnia ŭ čas praviadzieńnia Antyterarystyčnaj apieracyi.

Takoje rašeńnie pryniaŭ prezident Piotr Parašenka.

Jon vykazaŭ hłybokija spačuvańni siemjam zahinułych.

«U niadzielu ja abviaščaju dzień žałoby pa našych vajskoŭcach. Heta vialikaja strata nie tolki dla siemjaŭ zahinułych, ale i dla cełaj krainy. Usie, chto maje dačynieńnie da cyničnaha, terarystyčnaha aktu takoha maštabu, abaviazkova buduć pakaranyja. Ukrainie patrebny mir. Adnak terarysty atrymajuć adekvatny adkaz», — zajaviŭ kiraŭnik dziaržavy.

Piotr Parašenka daručyŭ sklikać pasiadžeńnie Savieta nacyjanalnaj biaśpieki i abarony, a taksama daručyŭ Kabinietu ministraŭ akazać dapamohu siemjam zahinułych.

Siońnia, 14 červienia, kala 1.10 padčas zachodu na pasadku ŭ aeraporcie Łuhanska strełam ź zienitnaha rakietnaha kompleksu bajeviki źbili vajenna-transpartny samalot Uzbrojenych sił Ukrainy Ił-76. Na borcie samalota, akramia 9 členaŭ ekipaža, znachodzilisia 40 vajskoŭcaŭ. Usie jany zahinuli. Prakuratura adkryła kryminalnuju spravu pa artykule «terakt».

Siońnia ž u Maryupali ŭ vyniku abstrełu kałony transpartu troje pamiežnikaŭ zahinuli i čaćviora atrymali ranieńni. Kałona trapiła pad abstreł z aŭtamataŭ i hranatamiota na ŭskrainie horada, pablizu zavoda «Azoŭstal».

Клас
0
Панылы сорам
0
Ха-ха
0
Ого
0
Сумна
0
Абуральна
0