MAZ nie śpiecyjalizujecca na vypusku aŭtamabilaŭ dla rakietnych kompleksaŭ Rasii. Pra heta BiełaPAN paviedamili na pradpryjemstvie ŭ suviazi z učarašniaj publikacyjaj u haziecie «Iźviestija».

Jak pisała vydańnie, «Minabarony Rasii płanuje da 2014 hoda admovicca ad dalejšych zakupak hruzavikoŭ «MAZ», na jakich pieravoziacca rakietnyja kompleksy «Avanhard» i «Jars». Vysokapastaŭlenaja krynica ŭ kamandavańni rakietnych vojskaŭ stratehičnaha pryznačeńnia paviedamiła «Iźviestijam», što zamiest biełaruskich hruzavikoŭ mižkantynientalnyja rakiety buduć stavić na ajčynnyja «KAMAZy».

«Aŭtaram apublikavanaha materyjału dapuščana faktyčnaja niedakładnaść. Ministerstva abarony Rasijskaj Fiederacyi supracoŭničaje z AAT „Minski zavod kołavych ciahačoŭ“,
jakoje śpiecyjalizujecca na vypusku darožnych i pazadarožnych aŭtamabilaŭ vialikaj hruzapadjomnaści i pryčapnoj techniki vajennaha pryznačeńnia, a nie z AAT „Minski aŭtamabilny zavod“ — kirujučaja kampanija chołdynhu „BiełaŭtaMAZ“, jakoje śpiecyjalizujecca na vypusku hruzavoj, pasažyrskaj, śpiecyjalnaj i pryčapnoj techniki hałoŭnym čynam hramadzianskaha pryznačeńnia», — skazali BiełaPAN na pradpryjemstvie.

Na dumku pradstaŭnikoŭ MAZa, hetaja niedakładnaść mahła ŭźniknuć u suviazi z tym, što AAT «MZKC» pieršapačatkova było stvorana ŭ 1954 hodzie ŭ jakaści śpiecyjalnaha kanstruktarskaha biuro № 1, jakoje ŭvachodziła ŭ skład Minskaha aŭtamabilnaha zavoda. U 1991 hodzie Minski zavod kołavych ciahačoŭ byŭ vyviedzieny sa składu VA «BiełaŭtaMAZ».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?