Prezidentu Vieniesueły Uha Čavesa, jakoha rychtujuć da novaj apieracyi pa vydaleńni rakavaj puchliny, imavierna, zastałosia žyć niekalki miesiacaŭ. Pra heta kałumbijskaj radyjostancyi RCN paviedamiŭ mieksikanski lekar Chase Rafael Markina, jaki raniej nieadnarazova pieradavaŭ infarmacyju z krynic, blizkich da daktaroŭ Čavesa.

Pa słovach Markina, Čaves moža pamierci ŭžo ŭ krasaviku.

«Prezidentu zastałosia dzieści dva ci try miesiacy. Na žal, fatalnaja raźviazka adbudzieccaŭ krasaviku», — skazaŭ lekar.

«U dadzieny momant chvaroba viarnułasia ŭ ahresiŭnaj formie i źjavilisia mietastazy ŭ pajaśničnaj zonie, heta pryviało da zdušvańnia nierva ŭ pajaśničnym adździele chrybta, što moža pryvieści da paraliču. Heta źjaŭlajecca padstavaj dla radkovaha chirurhičnaha ŭmiašańnia, vielmi składanaha ź nieŭrałahičnaha punktu hledžańnia», — rastłumačyŭ Markina, dadaŭšy, što paśla apieracyi ŭ Čavesa mohuć adbycca surjoznyja ŭskładnieńni.

Raniej prezident Vieniesueły Uha Čaves zajaviŭ, što padčas abśledavańnia na Kubie ŭ jaho byli vyjaŭlenyja novyja złajakasnyja kletki i ciapier jamu treba budzie pieranieści jašče adnu apieracyju pa ich vydaleńni. Dla 58-hadovaha Čavesa heta budzie ŭžo čaćviortaja apieracyja za niapoŭnyja dva hady.

Uha Čaves jak palityk bačyŭ svaju misiju ŭ baraćbie sa Złučanymi Štatami dy padtrymcy kožnaha praciŭnika Zachadu. Svaje mety jon realizoŭvaŭ z dapamohaj dachodaŭ ad nafty, jakuju, darečy, Vieniesueła pradaje tym samym ZŠA. Siarod inšaha, Čaves kredytavaŭ Alaksandra Łukašenku, a taksama zakuplaŭ biełaruskija tavary i pastaŭlaŭ naftu ŭ Biełaruś pa vyhadnaj canie.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?