У Веткаўскім раёне пройдзе свята беларускага ручніка 1

У вёсцы Няглюбка Веткаўскага раёна 6 кастрычніка адбудзецца абласное свята беларускага ручніка. У мерапрыемстве возьмуць удзел майстры з кожнага раёна Гомельскай вобласці, якія прадставяць свой арнамент ручніка і падзеляцца з усімі ахвотнымі асаблівасцямі вырабу ручнікоў сваёй мясцовасці.

Як паведамілі БелаПАН у прэс-службе Гомельскага аблвыканкама, гасцей і жыхароў Няглюбкі чакаюць выставы ручнікоў, выступленні лепшых творчых калектываў Гомельшчыны, майстар-класы, работа падворкаў.

Няглюбка — унікальная вёска, якая славіцца сваімі традыцыямі ткацтва.

Ручнікі мясцовых традыцый напоўнены сімволікай і арнаментальнымі знакамі, старэйшым з якіх больш чым тысяча гадоў. Выкананыя мясцовымі майстрамі на драўляных кроснах, яны падарожнічаюць па ўсім свеце, з’яўляючыся ўдзельнікамі міжнародных выстаў у Нью-Ёрку, Манрэалі, Токіа, Парыжы, Бруселі. Амерыканскі музей «Метраполітэн» набыў іх для сваёй калекцыі. Многімі музеямі свету няглюбскаму ручніку прысуджаны залатыя медалі, ён упрыгожвае адну з залаў ААН.

Няглюбскія ручнікі па гэты дзень захоўваюць агульныя рысы падняпроўскіх ручнікоў і разам з тым прадстаўляюць адметны лакальны тып, які на працягу XX стагоддзя няспынна развіваўся ў сваіх мастацка-тэхналагічных традыцыях у Няглюбцы, адзначаецца ў паведамленні.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ