Дарафееў пераехаў у Кіеў, будзе весці ток-шоу на Пятым канале 38

Сяргей Дарафееў падпісаў трохгадовы кантракт з украінскім «5 каналам» і будзе рабіць там сваё аналітычнае шоу. Яно па сваёй форме будзе нагадваць праграму «Выбар+», якую Сяргей вёў на АНТ. У Кіеве ён правёў усё лета, а праграма стартуе ўвосені, піша «Комсомольская правда в Беларусі».

Дарафееў будзе весці яе па-расейску, але актыўны асвойвае і ўкраінскую мову. Ягоны тата — украінец, бацькі вучыліся ў Кіеве і размаўлялі па-ўкраінску.

Дарафеева звольнілі з АНТ пасля таго, як ён задаваў сумленныя пытанні кіраўніцы Цэнтрвыбаркама Ярмошынай у вечар пасля выбараў.

Сяргей Дарафееў быў адным з самых папулярных тэлевядучых Беларусі. Ён пачынаў як вядучы навінаў і ранішняга эфіру АНТ. Пасля ён стаў рабіць ток-шоу — самае рэйтынгавае ў краіне. У ім ён пазбягаў палітыкі і вострых кутоў, хоць і дазваляў некаторыя дыскусіі на бяспечныя тэмы грамадства й культуры. Нават гэтым памяркоўным плюралізмам праграма вылучалася на агульным тле лукашэнкаўскага тэлебачання.

19 снежня ў жывы эфіры ён спытаў у Ярмошынай, ці бачыла яна ролік, у якім у тэхнікуме куратарка адной з груп патрабуе ад вучняў з’явіцца на датэрміновае галасаванне і ці з’яўляецца такая сітуацыя парушэннем заканадаўства. «Так, гэта парушэнне», — адказала Ярмошына. «Дык значыцца, выбары прайшлі з парушэннямі?» — падлавіў яе Дарафееў. У выніку Лідзія Ярмошына дэманстратыўна пакінула студыю.

Перадача выклікала асабістае незадавальненне Аляксандра Лукашэнкі, які падчас прэс-канферэнцыі назваў Дарафеева «хлопчыкам-журналістам, якога трэба паставіць на месца».

Неўзабаве пасля гэтага Дарафеева адправілі ў адпачынак, а пасля і зусім звольнілі. Пасля гэтага Дарафееў выбіраў між Масквой і Кіевам. «Белсат» працы Дарафееву не прапаноўваў.

Сяргей Гезгала

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ