У Беларусі з пачатку года ад няшчасных выпадкаў загінулі 48 дзяцей

Пра гэта паведаміў намеснік начальніка аддзела ўпраўлення прафілактыкі Міністэрства ўнутраных спраў Валерый Мялешка 31 мая на прэс-канферэнцыі ў Мінску.

Паводле яго слоў, за аналагічны перыяд мінулага года загінула 54 дзіцяці. За ўвесь мінулы год — 389 дзяцей. Нягледзячы на тэндэнцыю да зніжэння няшчасных выпадкаў з гібеллю дзяцей, Мялешка ацаніў такія лічбы як «несуцяшальныя».

Асаблівую заклапочанасць МУС выклікаюць «недарэчныя» здарэнні, якія пацягнулі гібель дзіцяці, якой можна было б пазбегнуць. Напрыклад, некалькі падлеткаў малатком разбіралі міну часоў Вялікай айчыннай вайны, да гэтага міну бачылі бацькі аднаго з іх і ніяк не перашкодзілі трагедыі. У выніку адзін падлетак загінуў, трое атрымалі цяжкія раненні.

Нярэдкія таксама выпадкі гібелі дзяцей у выніку ўтаплення ці пажараў, якія справакаваныя «бацькоўскай і педагагічнай неадукаванасцю».

Як адзначыў Мялешка, у сувязі з гэтым МУС праводзіцца «вялікая праца» па інфармаванні як дзяцей пра бяспечныя паводзіны, так і іх бацькоў: транслюецца сацыяльная рэклама, праводзіцца тыдзень прававых ведаў і іншыя спецыяльныя мерапрыемствы.

Як паведаміла старшы інспектар па асаблівых даручэннях упраўлення Дзяржаўнай аўтамабільнай інспекцыі МУС Ганна Банадык, сёлета ў выніку дарожна-транспартных здарэнняў у Беларусі загінула 14 дзяцей, 171 дзіця атрымала траўмы і калецтвы. 50% ДТЗ учыняецца з удзелам дзяцей-пешаходаў, але, як правіла, у такіх здарэннях траўмы — меней цяжкія ў адрозненне ад траўм дзяцей-пасажыраў, якія часта паміраюць. Сёлета з 14 загінулых у ДТЗ дзяцей шэсць — дзеці-пасажыры, пяць — дзеці-пешаходы, двое — веласіпедысты, прычым адзін з іх трохгадовы, і адзін матацыкліст.

Паводле слоў Банадык, сёлета 80% ДТЗ з нанясеннем траўм дзецям адбылося па віне вадзіцеляў. Аднак чакаецца, што падчас летніх канікул узрасце лік ДТЗ, якія адбываюцца з-за таго, што дзеці пакінутыя без нагляду або парушаюць правілы дарожнага руху.

Як адзначыла прадстаўнік ДАІ МУС, у летні час асаблівая ўвага будзе надавацца перавозцы дзяцей на экскурсіі, тэатральныя спектаклі, цыркавыя паказы, да месцаў масавага і аздараўленчага адпачынку. Асаблівая ўвага таксама будзе надавацца перавозкам дзяцей аўтобусамі.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ