Старшыня дзяржсавета Кубы Рауль Кастра прапануе абмежаваць знаходжанне на найвышэйшых палітычных пасадах краіны двума тэрмінамі па пяць гадоў,
Пра гэта Кастра заявіў у сваёй прамове на адкрыцці першага за апошнія 14 гадоў з’езду кампартыі краіны.
Ён заявіў, што партыйнае кіраўніцтва мае патрэбу ў абнаўленні і павінна быць здольным на сур’ёзную самакрытыку.
Выказаная Раулем прапанова аб абмежаванні тэрмінаў кіраўніцтва не мае прэцэдэнтаў у камуністычнай «гісторыі вострава свабоды».
Асноўная ўвага ў сваёй прамове на адкрыцці з’езду ён засяродзіў на планах знізіць ролю дзяржавы ў эканоміцы і на заахвочванні прыватных прадпрыемстваў.
Паводле яго словаў, Кубе спатрэбіцца па меншай меры пяць гадоў, каб абнавіць існуючую эканамічную сістэму.
Рауль Кастра паабяцаў захаваць бясплатную адукацыю і ахову здароўя, аднак заявіў, што дзяржаўныя выдаткі будуць «рацыяналізаваныя», а субсідаванне тавараў першай неабходнасці будзе спынена.
Між тым кіраўнік краіны папярэдзіў, што сацыялізм на Кубе «непарушны» і што назапашванне уласнасці дазволена не будзе.
