Фота Reuters, 4 мая 2010 года.
«Я да гэтай пары схільны да таго, што яны павінны прайсці, гэтыя выбары, ну, напэўна, у пачатку наступнага года, пасля сканчэння тэрміну паўнамоцтваў дзейнага прэзідэнта»,
— заявіў Аляксандр Лукашэнка ў інтэрв'ю агенцтву Reuters 4 мая. Фрагменты гутаркі былі паказаныя па беларускіх тэлеканалах.
У адпаведнасці з заканадаўствам прэзідэнцкія выбары павінны быць прызначаныя не пазней чым за пяць месяцаў і праводзяцца ў нядзелю не пазней чым за два месяцы да сканчэння тэрміну паўнамоцтваў папярэдняга прэзідэнта. Такім чынам, крайні тэрмін правядзення прэзідэнцкіх выбараў — 6 лютага 2011 года.
У інтэрв'ю БелаПАН старшыня Цэнтрвыбаркама
Лідзія Ярмошына не выключае правядзення прэзідэнцкіх выбараў восенню 2010 года «Канечне, выбары было б зручней правесці да Новага года. Быў бы іншы настрой у грамадстве», — лічыць яна.
Ярмошына падкрэсліла, што наконт даты прэзідэнцкіх выбараў з ёй «ніхто не раіўся». «Дата прэзідэнцкіх выбараў — пытанне палітычнае. Але Цэнтрвыбаркам павінен разглядаць пытанне правядзення выбараў у тым ліку ў практычнай плоскасці. Мне б не хацелася ўжо ў верасні пачынаць актыўную працу, але я б з разуменнем паставілася да прызначэння выбараў на восень», — сказала Ярмошына.
Яна таксама адзначыла, што прэзідэнцкія выбары прызначае парламент. Паводле слоў кіраўніка ЦВК, калі не праводзіць пазачарговых парламенцкіх сесій, то дата выбараў не можа быць прызначаная раней за кастрычнік.
На думку шэрагу аналітыкаў,
прызначэнне прэзідэнцкіх выбараў восенню выгадна ўладам, так як зблытае карты палітычным апанентам Лукашэнкі.
Акрамя таго, эксперты не выключаюць уплыву эканамічных фактараў падчас прызначэння даты прэзідэнцкіх выбараў. Паводле іх меркавання, пагаршэнне супрацоўніцтва з Расіяй можа прывесці да рэзкага падаражання энерганосьбітаў, а значыць, і росту цэн у пачатку 2011 года. У такіх умовах рэйтынг Лукашэнкі можа істотна знізіцца.
У 2006 годзе выбары прэзідэнта Беларусі павінны былі прайсці летам, аднак іх дату перанеслі на сакавік. Гэта стала нечаканасцю для апазіцыі, прадстаўнікі якой заяўлялі, што ім не хапіла часу на раскрутку свайго кандыдата.
