Відныя літоўскія дзеячы навукі і мастацтва, сярод іх Томас Вянцлава, Оскарас Каршуновас, Юозас Будрайціс, Эгідзіюс Александравічус, Мар’юс Івашкявічус, Гінтаўтас Мажэйкіс напісалі адкрыты ліст прэзыдэнту Францыі Эманюэлю Макрону напярэдадні яго візыту ў Літву, піша Радыё Свабода.
«Памятаючы, зь якой цяжкасьцю мы спрабавалі дагрукацца да заходнеэўрапейскіх сталіцаў у 1990-я, мы напісалі публічны ліст прэзыдэнту Францыі Эманюэлю Макрону дзеля свабоды братоў-беларусаў, і выслалі ліст у Парыж напярэдадні яго візыту ў Літву», — паведамляе ў Фэйсбуку Дар’юс Куоліс, літоўскі культуроляг, грамадзкі дзеяч і палітык.
Ліст падпісалі 45 відных літоўскіх інтэлектуалаў, дзеячоў навукі і мастацтва,
Мастак Стасіс Эйдрыгявічус аформіў ліст у выглядзе пляката.
Прэзыдэнту Францускай Рэспублікі спадару Эманюэлю Макрону Вільня, 27 верасьня 2020 году
Спадар Прэзыдэнт,
У 1990 годзе мы, літоўцы, якія змагаліся за сваю свабоду, упарта заклікалі да сумленьня Францыі і Эўропы. І нарэшце мы былі пачутыя.
Сёньня да Вашага і нашага сумленьня, да сумленьня Эўропы заклікаюць нашы браты і сёстры беларусы. Іх жанчыны і мужчыны зазнаюць нялюдзкія катаваньні. І гэта адбываецца ў Эўропе XXI стагодзьдзя!
Мы спадзяемся, што Вы і свабодалюбівая Францыя пачуеце балючы крык свабоды людзей Беларусі.
З павагай,
Літоўскія пісьменьнікі, мастакі, навукоўцы
Нагадаем, што Эмануэль Макрон заявіў у інтэрв'ю Le Journal du Dimanche, што Лукашэнку варта добраахвотна сысці са сваёй пасады.
