На ўкраінскім напрамку як у пунктах пропуску, так і на зялёнай мяжы будзе павялічана колькасць пагранічных нарадаў. Пра гэта БЕЛТА паведаміў афіцыйны прадстаўнік Дзяржпагранкамітэта Антон Бычкоўскі.
Афіцыйны прадстаўнік нагадаў, што ўзаемадзеянне органаў памежнай службы Беларусі з украінскімі калегамі вядзецца на ўзроўні галоўных памежных упаўнаважаных, якімі з’яўляюцца кіраўнікі пагранічных ведамстваў. Узаемадзеянне ёсць і на ўзроўні начальнікаў тэрытарыяльных органаў памежнай службы на сумесна ахоўных участках мяжы, аж да камандзіраў падраздзяленняў мяжы.
«Для актывізацыі ўзаемадзеяння на беларуска-ўкраінскай мяжы таксама задзейнічаны кантактны пункт «Пінск-Жытомір», які з’яўляецца адным з элементаў сістэмы інтэграванага кіравання межамі. Ён абсталяваны сучаснымі сродкамі прамой сувязі для аператыўнага абмену інфармацыяй у рэжыме аўдыя- і відэаканферэнцый. Гэта дазваляе ў максімальна сціснутыя тэрміны кропкава рэагаваць на ўзнікаючыя пагрозы ў мэтах гарантавання пагранічнай бяспекі на гэтым кірунку. Інфармацыя ў гэты кантактны пункт прыходзіць з усіх тэрытарыяльных органаў памежнай службы, якія ахоўваюць беларуска-ўкраінскі ўчастак мяжы», - адзначыў Антон Бычкоўскі.
