Фота Надзеі Бужан
У выходныя па вуліцах Мінска паедзе вайсковая тэхніка. Гэта падрыхтоўка да Дня паветрана-дэсантных войскаў. Само свята 2 жніўня (нядзеля), але асноўныя гулянні ў сталіцы пройдуць на дзень раней (г.зн. у суботу), паведамляе афіцыйны тэлеграм-канал Міністэрства абароны.
2 жніўня ў Беларусі адзначаць 90-годдзе паветрана-дэсантных войскаў.
У Мінску асноўныя гулянні пройдуць 1 жніўня з 10.00 да 14.00. Месца: праспект Пераможцаў ля Палаца спорту. У праграме будуць удзельнічаць вайскоўцы сіл выратавальных аперацый.
Напрыклад, вайскоўцы будуць дэсантавацца з верталёта на зямлю і ў Свіслач, пакажуць заняткі па рукапашным боі і баявыя эпізоды.
Механікі-кіроўцы БТР прадэманструюць «вальс машын на вадзе». Яшчэ будзе выстава тэхнікі, узбраення, формы адзення.
Мінабароны папярэджвае, што ў горадзе з'явяцца калоны ваеннай і спецыяльнай тэхнікі. Яны будуць рухацца па дарогах для падрыхтоўкі да свята, а потым вяртацца назад.
25 ліпеня тэхніка прыбудзе ў Мінск. Рух перакрывацца не будзе;
26 ліпеня з 19.00 да 22.00 — рэпетыцыя ля Палаца спорту. Тэхніка будзе рухацца з 18.00 па такім маршруце: Калодзішчы —МКАД — праспект Пераможцаў — Палац спорту.
Вяртанне — тым жа шляхам. Рух аўтамабільнага транспарту абмяжуюць.
Як вайскоўцы і тэхніка будуць вяртацца назад 1 жніўня, паведамяць пазней.
