У рэдакцыю TUT.BY трапіў загад, які прадпісвае супрацоўнікам Нацыянальнага парку «Белавежская пушча» не выкарыстоўваць у сваёй гаспадарчай дзейнасці «сайты TUT.BY і Onliner.by.
Загад № 225-п «Аб забароне наведвання інтэрнэт-парталаў» ад 1 ліпеня (гэта значыць ад учорашняга дня) даслаў супрацоўнік парку «Белавежская пушча», які пажадаў захаваць ананімнасць (яго імя ёсць у рэдакцыі).
Паводле яго слоў, дакумент атрымалі начальнікі аддзелаў арганізацыі, якія паведамілі пра змест загаду супрацоўнікаў пад роспіс.
У загадзе гаворыцца пра тое, што супрацоўнікі Нацыянальнага парку павінны «пад персанальную адказнасць» выключыць выкарыстанне парталаў TUT.BY і Onliner.by у сваёй «гаспадарчай дзейнасці».
Нельга заходзіць на інтэрнэт-парталы, а таксама іх субдамены з любых лічбавых прылад і сетак перадачы дадзеных, якія належаць парку. Прычым тэхнік-праграміст і адміністратар сетак павінны кожны дзень выбарачна правяраць камп'ютары супрацоўнікаў «на прадмет наведвання» згаданых сайтаў.
Усё гэта робіцца «для парадкавання выкарыстання нацыянальнага сегмента сеткі Інтэрнэт» і грунтуецца на загадзе № 341-п, выдадзеным у жніўні мінулага года. Гэты дакумент, як паказала наша крыніца, таксама быў выпушчаны выключна для супрацоўнікаў Нацыянальнага парку «Белавежская пушча».
За падрабязнасцямі мы звярнуліся да намесніка генеральнага дырэктара арганізацыі Алеся Карповіча, згаданага ў загадзе. Факт наяўнасці дакумента ён нам не пацвердзіў, параіўшы пісаць афіцыйны запыт да дырэктара нацпарка «Белавежская пушча».
Рэдакцыя партала даслала на адрас арганізацыі афіцыйны запыт.
Раней у рэдакцыю TUT.BY ужо звярталіся супрацоўнікі дзяржарганізацый, якія паведамлялі, што ў іх праблемы з доступам да навінавых сайтаў, уключаючы TUT.BY і Onliner. Праблема назіралася пры выкарыстанні паслуг правайдара BELISP. Тады ў тэхпадтрымцы правайдара парталу сказалі, «што заблакавалі арганізацыі, якія адносяцца да Кіраўніцтва спраў (Кіраўніцтва спраў прэзідэнта Рэспублікі Беларусь. — Заўв. TUT.BY), і таму не працуе ні Onliner, ні TUT.BY». Аднак начальнік аддзела арганізацыі Аляксандр Комлач факт блакавання не пацвердзіў.
Нагадаем, што Нацыянальны парк «Белавежская пушча» таксама знаходзіцца ў падпарадкаванні Кіраўніцтва спраў прэзідэнта Рэспублікі Беларусь.
