PA Media
З 20 сакавіка смяротнасць у Брытаніі перавысіла звычайны ўзровень амаль на 64 тысячы чалавек, або прыкладна на адну пятую, паведаміла Бі-бі-сі ў аўторак Нацыянальнае бюро статыстыкі.
Звычайны ўзровень у дадзеным выпадку — сярэдняя колькасць памерлых у гэтым жа сезоне за апошнія пяць гадоў.
Эпідэміёлагі лічаць перавышэнне смяротнасці над звычайным узроўнем самым верным спосабам вызначыць рэальную колькасць ахвяр хваробы.
Гэты метад аднолькава выкарыстоўваецца ў дачыненні да ўсіх краін, тады як нацыянальныя методыкі падліку памерлых ад СOVID-19 адрозніваюцца: у адных краінах у іх лік уключаюць усіх, у каго на момант смяротнага выніку быў знойдзены каранавірус, у іншых — толькі тых, у каго ён з'явіўся непасрэднай і галоўнай прычынай смерці.
З іншага боку, колькасць памерлых падчас эпідэміі звыш звычайнага ўзроўню ўключае і тых, хто памёр ад іншых хвароб, своечасова не атрымаўшы патрэбнай дапамогі з-за перагружанасці медустаноў ці страху выйсці з дома.
Паводле звестак, апублікаваных брытанскім урадам напярэдадні, людскія страты ад СOVID-19 у Брытаніі склалі 40.680 чалавек. Гэтая лічба абнаўляецца штодня і ўключае ў сябе ўсіх памерлых, у каго быў знойдзены каранавірус. Гэта другі паказчык у свеце пасля ЗША.
Па ўзроўні смяротнасці ад каранавіруса у пераліку на долю насельніцтва, паводле афіцыйнай статыстыкі, Злучанаму Каралеўству належыць сумнае першынство — 610 чалавек на мільён жыхароў.
