EFE
Улады Іспаніі аслабілі абмежаванні, уведзеныя ў краіне з-за эпідэміі каранавіруснай інфекцыі. З 13 красавіка працу аднавілі кампаніі, супрацоўнікі якіх не могуць працаваць выдалена, паведамляе BBC News.
Пасля двух тыдняў прастою ў Іспаніі на працу змаглі вярнуцца супрацоўнікі будаўнічых кампаній, заводаў і некаторых службаў. Пры гэтым яны павінны выконваць строгія меры бяспекі. Так, будаўнікі могуць працаваць толькі ў раёнах, аддаленых ад жыхароў.
Рашэнне аслабіць абмежаванні ў Іспаніі выклікала крытыку з боку прафсаюзаў і шэрагу чыноўнікаў, у тым ліку ў Каталоніі. Пры гэтым большая частка насельніцтва застаецца на каранціне ў сваіх дамах, а грамадскія месцы, бары і шматлікія крамы будуць зачыненыя як мінімум да 26 красавіка.
У Італіі большасць абмежаванняў будзе дзейнічаць да 3 мая, але ўжо з 14 красавіка частка кампаній зможа аднавіць працу. У гэты дзень адкрыюцца некаторыя прадпрыемствы, а таксама крамы па продажы кніг, канцылярскіх тавараў і дзіцячай вопраткі.
