Па Грозненскім тэлебачанні паказалі падлетка, які плакаў. Ён пісаў крытычныя каментары пра ўладу.
Сюжэт, у якім 16-гадовы Магамед Ахматаў слёзна просіць прабачэння, доўжыцца 46 хвілін. Хлопчык распавядае, што паверыў тым, хто жыве ў Еўропе і Сірыі, і пісаў пра тое, чаго няма. Муфтый Чачні адчытвае Ахматава з цэлым стосам раздрукаваных каментароў, маці і дзядзька кажуць, што не ўсачылі, Рамзан Кадыраў патрабуе ўзмацніць працу ў сацсетках.
«Мала хто паверыў бы, што смелы праваборац у жыцці выглядае вось так», — кажа закадравы голас, пасля чаго паказваюць падлетка, які рыдае. «Я вельмі раскайваюся, мяне падманулі ў інтэрнэце. Я паспрабую, каб больш такога не паўтаралася. Я прашу прабачэння ва ўсяго чачэнскага народа», — кажа скрозь слёзы Ахматаў. «Гэта і ёсць наш інтэрнэт-прапаведнік», — рэзюмуе карэспандэнт.
У сацсетках Ахматаў абвінавачваў улады Чачні ў вераадступніцтве і ў карупцыі: «Я скраду ў вас мільярды і таксама падару вам 50 кватэр», — піша падлетак у адным з каментароў.
За два дні да таго, як Ахматава паказалі па чэчэнскім тэлебачанні, падлетка згадаў Рамзан Кадыраў. У час сустрэчы з міністрам друку Кадыраў распавёў, што Ахматаў называў яго (Кадырава) кафірам (няверным), муртадам (вераадступнікам) і іншымі словамі.
«Учора знайшлі, прывялі, думаў, што не знойдзем у «Інстаграме», — кажа пра падлетка кіраўнік Чачні. — Пры разглядзе аказалася, што сям'я ледзь зводзіць канцы з канцамі, бацькі няма, няшчасная маці».
Па словах аўтара сюжэту, Ахматава знайшлі з дапамогай праваахоўных органаў. Пра тое, што чакае падлетка пасля выкрыцця, у сюжэце не сказана.
У сюжэце супрацоўнік чачэнскага Цэнтра па прафілактыцы экстрэмізму, седзячы спінай да камеры, кажа, што ведамства пастаянна сочыць за людзьмі, якія займаюцца экстрэмісцкай і тэрарыстычнай дзейнасцю.
Адвакат Антон Жараў у размове з Бі-бі-сі сказаў, што крымінальны кодэкс не забараняе плакаць перад камерамі, але ёсць міжнародныя абавязацельствы Расіі — Канвенцыя аб правах дзіцяці, Пекінскія правілы, Канвенцыя аб правах чалавека і многія іншыя.
«Любое правасуддзе для непаўналетніх павінна будавацца з разумнай ступенню таямніцы», — кажа ён. Адвакат сцвярджае, што нават калі дзіця здзейсніла правапарушэнне, яго павінны караць па пэўных правілах. Правілы гэтыя, па словах юрыста, у тым, што камера не павінна прысутнічаць ні на камісіі па справах непаўналетніх, ні ў судзе.
Жараў лічыць, што гэта гісторыя не пра адміністрацыйна-прававы складнік, а пра булінг. «Гэта вельмі падобна на тое, калі настаўніца прымушае паперку з'есці перад усім класам. У ХХІ стагоддзі гэта зусім за мяжой дабра і зла», — адзначае ён. Юрыст лічыць, кіраўнік рэгіёну як гарант канстытуцыі, павінен сказаць, што такія рэчы недапушчальныя.
Магамед Ахматаў — самы юны з усіх, хто прасіў прабачэння за крытыку Кадырава. Героямі відэа з выбачэннямі перад кіраўніком Чачні ў розны час станавіліся жыхары Чачні, блогеры і дэпутаты.
