Пратаіерэй Фёдар Поўны, настаяльнік храма Усіх святых у Мінску, нібыта мае намер узначаліць царкоўную камісію па вывучэнні сітуацыі з Курапатамі. Пра гэта паведаміла ў фэйсбуку тэолаг Наталля Васілевіч.
Фёдар Поўны кажа, што ніякай камісіі няма, але ён гэтым пытаннем сапраўды займаецца.
Чытайце. Фёдар Поўны пра знос крыжоў: Курапаты — метафарычна чалавечая Галгофа
«Патрыяршы экзарх даручыў, каб мы прапрацавалі гэтае пытанне для канчатковага фарміравання пазіцыі праваслаўнай царквы і знайшлі ўсе гістарычныя дадзеныя. «Вы там бліжэй, выказваліся па гэтым пытанне, займіцеся», — вось так ён мне сказаў. Я пагадзіўся», — сказаў Фёдар Поўны.
«Я збіраюся правесці сур'ёзную работу, разабрацца, паглядзець дакументы, бо ёсць вельмі шмат самай рознай інфармацыі, а калі не бачыў арыгіналаў, то не ведаеш каму верыць. Пасля нашых ацэнак, я думаю, выкажацца і патрыяршы экзарх», — дадаў ён.





