Нічога не зменіцца пасля парламенцкіх выбараў у Паўднёвай Афрыцы. Афрыканскі нацыянальны кангрэс, які з часоў рэжыму апартэіду аб'ядноўвае чорнае насельніцтва, набраў 57% галасоў. Партыя Дэмакратычны саюз, якая адлюстроўвае інтарэсы белага і каляровага насельніцтва, — 22%. Вырасла папулярнасць партыі Economic Freedom Fighters («Змагары за эканамічную свабоду»), якая ўпершыню набрала больш за 10% галасоў. Зулусы, у сваю чаргу, традыцыйна галасавалі за сваю «Інкату».
Паўднёвая Афрыка — гэта краіна, якая да пачатку 1990-х жыла пры апартэідзе. Краінай кіравалі белыя, а чорная большасць не мела палітычных правоў. Гэта адзіная краіна Афрыкі, якая па сваім развіцці блізкая да ўзроўню краін Усходняй Еўропы.
Яе, затое, моцна вылучае колькасць заражаных ВІЧ. Прыкладна 12% з яе 58-мільённага насельніцтва носяць гэтую смяротную заразу. Прычым сярод чорных гэтая доля дасягае 14%, тады як сярод белых — толькі 0,6%.
