У Ляхавічах зарэгістравана захворванне на адзёр чатырохмесячнага дзіцяці, паведаміў БЕЛТА галоўны ўрач цэнтральнай раённай бальніцы Георгій Хлябовіч.
Дзіця родам з Ваўкавыска. У Ляхавіцкі раён яго і двух старэйшых унукаў 2014 і 2015 гадоў нараджэння 15 сакавіка прывезла бабуля, якая ўзяла над дзецьмі апякунства пасля таго, як іх бацькоў пазбавілі бацькоўскіх правоў. Чатырохмесячнае дзіця да пераезду знаходзілася ў Ваўкавыску ў бальніцы. З падазрэннем на захворванне на адзёр 17 сакавіка яго даставілі ў інфекцыйнае аддзяленне Ляхавіцкай раённай бальніцы. Неўзабаве дыягназ быў пацверджаны вірусалагічнай лабараторыяй ў Мінску. Для далейшага лячэння 21 сакавіка перавялі ў дзіцячае інфекцыйнае аддзяленне Баранавіцкай гарадской бальніцы.
Яго стан медыкі ацэньваюць як цяжкі і стабільны.
У Ваўкавыску было лабараторна пацверджана 24 выпадкі адзёру.
