У інтэрнэце з'явілася інфармацыя: у школе №14 горада Маладзечна за ўваход на навагоднія ранішнікі вырашылі зрабіць платным. Кошт квітка — 1 рубель 20 капеек. Сітуацыя, як піша «Рэгіянальная газета», абурыла многіх бацькоў. Аднак, як патлумачыла TUT.BY дырэктар навучальнай установы Каліна Капуцкая, усе ранішнікі ў школе бясплатныя. Рубель дваццаць каштуе білет на спектакль «Злыднін Новы год», які вучні і педагогі падрыхтавалі ў рамках бізнэс-кампаніі.
— У нас у школе працуе бізнэс-кампанія, калі мы вучым дзяцей прадпрымальніцтву, — тлумачыць сітуацыю Каліна Капуцкая. — Яны асвойваюць нейкую прафесію і могуць зарабіць.
Напрыклад, юныя акцёры рыхтуюць спектакль, на які прадаюцца білеты. Пазней дзецям за выступ будзе заробак. Пры гэтым цана квітка, кажа дырэктар, вызначаецца прэйскурантам цэн, пралічаных аддзелам адукацыі.
— Спектакль «Злыднін Новы год» мы хацелі паказаць на зімовых канікулах, — працягвае суразмоўца. — Ён дадатковы. І прыйсці на яго дзеці і бацькі маглі па жаданні. Да ранішнікаў ён ніякага дачынення не мае. Зараз мы рыхтуем восем ранішнікаў для пачатковай школы, забаўляльную праграму для 5-8 класаў, і навагодняе прадстаўленне для 9-11 класаў — і ўсё гэта і для дзяцей, і для бацькоў бясплатна.
Па словах дырэктара, блытаніна з ранішнікамі і спектаклямі выйшла выпадкова.
— У інтэрнэце з'явілася інфармацыя, што спектакль каштуе рубель дваццаць, — распавядае Каліна Капуцкая. — Мяне набраў карэспандэнт, я патлумачыла: гэта кошт квітка на спектакль. Але, аказалася, што мы гаварылі пра розныя рэчы. Хачу сказаць, «Злыднін Новы год» — першы спектакль, якія мы планавалі паказаць платна ў рамках бізнэс-кампаніі. У выніку ён, як і ўсе навагоднія мерапрыемствы, будзе бясплатным.
