Новым рэктарам БДУ стаў гродзенец Андрэй Кароль. Той самы, які не мае дачынення да галоўнага ўніверсітэта краіны, абараніў педагагічныя дысертацыі ў Расіі і дазвання вычысціў усіх апазіцыйна настроеных выкладчыкаў з Гродзенскага дзяржаўнага ўніверсітэта.
«Паскудны чалавек» ці «выдатны выбар»: чаго чакаць ад новага рэктара БДУ?
Крытычныя заўвагі пасля прызначэнняў такога кшталту з’яўляюцца ў інтэрнэце даволі часта, але ў сітуацыі з Каралём дзяржаўныя СМІ вырашылі паспрабаваць палепшыць імідж рэктара
«Літаральна на наступны дзень сярод водгукаў з гэтай нагоды ў інтэрнэце сталі з'яўляцца і негатыўныя: маўляў, праводзіў няслушную кадравую палітыку, звузіў практыку прымянення беларускай мовы ў ВНУ і гэтак далей», — прызнае «Советская Белоруссія».
У якасці прамоўцаў у падтрымку Караля былі абраныя тры чалавекі.
«У якасці рэктара універсітэта праявіў сябе ініцыятыўным і мэтанакіраваным кіраўніком. Уся праца з прафесарскім складам абапіралася на агульную стратэгію развіцця, якая сумесна і выпрацоўвалася. Шмат увагі ён надаваў павышэнню педагагічнага майстэрства выкладчыцкага складу. Працаваць з ім было цікава і плённа», — расказаў пра Караля яго намеснік, прарэктар па вучэбнай працы ГрДУ Генадзь Гачко.
«Менавіта дзякуючы Андрэю Дзмітрыевічу стала магчымым стварэнне Навукова-тэхналагічнага парку. Ён актыўна прасоўваў гэтую ідэю, выносіў на абмеркаванне ў аблвыканкам. Агульнымі намаганнямі распрацавана канцэпцыя, пачаты рамонт будынка, у якім ужо да канца года размесцяцца першыя рэзідэнты, а таксама навукоўцы і студэнты», — дадаў выкладчык ГрДУ Аляксандр Васілевіч.
Станоўчае меркаванне падмацоўвае мама выпускніцы Ірына Анікевіч. Яе дачка вучылася на факультэце «Гісторыя, камунікацыя і турызм» — тым самым, які замяніў сабой гістарычны факультэт. «Апошні год Юлія сумяшчала вучобу з працай ва ўніверсітэце. Вынікам такой актыўнасці стала атрыманне некалькіх прапаноў аб працаўладкаванні», — запэўніла мама.
