Зацьменне Месяца над Крамлём. Фота: Павел Галоўкін
Расія збіраецца здзейсніць палёты на Месяц, перадае РІА Новості словы кіраўніка «Раскосмаса» Ігара Камарова.
На 2028-2029 гады ў «Раскосмаса» запланаваны беспілотны, а на 2029-2030 гады — пілатаваны палёт на Месяц.
Федэральнае касмічнае агенцтва ўжо прапрацоўвае ўсе папярэднія стадыі праекту.
Акрамя таго, «Раскосмас» разглядае шэраг праектаў звышцяжкай ракеты-носьбіта і ўжо абраў патэнцыйнага вытворцу. Пакуль Расія не мае звышцяжкай ракеты, першыя этапы месяцовай праграмы будуць выконвацца цяжкай ракетай «Ангара», якую плануецца запусціць у 2024 годзе.
Раней касмічная праграма Расіі аказалася пад пагрозай зрыву: экспертная рада Ваенна-прамысловага комплексу па даручэнні віцэ-прэм’ера Расійскай Федэрацыі Дзмітрыя Рагозіна разглядзела касмічную праграму і прыйшла да негатыўных высноў. Праект звышцяжкай ракеты быў названы эканамічна немэтазгодным.
Таксама крытыкавалася ідэя транспартнага адзінага карабля для калязямной арбіты і вандроўкі на Месяц. Аб гэтым праекце «Раскосмас» цяпер не казаў.