У рэдакцыю «Нашай Нівы» чытач даслаў ліст, у якім абураецца спісам экзаменацыйных тэм для іспыту па адным з курсаў 5-га курса перакладчыцкага факультэта Мінскага дзяржаўнага лінгвістычнага ўніверсітэта.
Ён абураўся фармулёўкай тэмаў у палітычным блоку спісу: тэмы перадаюць прарасійскі і антызаходні погляд на палітычныя падзеі, у тым ліку на крызіс ва Украіне.
Карэспандэнт «НН» пагутарыў з выкладчыцай МДЛУ Аленай Ялецкай, якая складала экзаменацыйныя пытанні. Ялецкая патлумачыла, што фармулёўка тэм заклікае да дыскусіі, а студэнтаў не схіляюць да нейкага канкрэтнага погляду:
«Наш курс называецца «Discussion. Debates» (Дыскусія. Дэбаты). Асноўная задача студэнтаў — навучыцца аргументавана адстойваць нейкі пункт гледжання. Вы можаце мець свой погляд, але вы мусіце аб'ектыўна глядзець на праблемы. А фармулёўка тэмы — гэта толькі матэрыял для дэбатаў, такім чынам яны могуць быць павёрнутыя іншым бокам.
Вось у нас ёсць тэма пра аборты. Яна можа быць сфармулявана як «Аборт — выбар жанчыны», а можа быць сфармулявана як «Аборт — наўмыснае забойства дзіцяці». І ніхто не прымушае студэнтаў казаць, што так гэта і ёсць, ніхто нікога ні да якога пункту гледжання не прымушае».
Што тычыцца падзей ва Украіне, то Ялецкая запэўніла, што, напрыклад, у мінулым годзе тэма пра Майдан была сфармулявана як «People's revolution» — то бок «Народная рэвалюцыя».
