Прэм'ер-міністр Беларусі Міхаіл Мясніковіч правёў двухбаковыя сустрэчы з кіраўнікамі дзяржаў і ўрадаў замежных краін, якія ўзялі ўдзел у саміце ААН па пытаннях клімату 23 верасня ў Нью-Ёрку, паведаміла прэс-служба беларускага ўрада.
У прыватнасці, ён абмеркаваў з прэзідэнтам Манголіі Цахіагійнам Элбэгдоржам ход падрыхтоўкі яго візіту ў Беларусь. «Былі адзначаны пэўныя поспехі ў рэалізацыі нашых сумесных праектаў і дамоўленасцяў, у першую чаргу гэта тычыцца транспартнага калідора. Тыя пагадненні і дамоўленасці, якія былі на стадыі рамачных пагадненняў, будуць раскрытыя і замацаваныя падчас візіту прэзідэнта Манголіі ў нашу краіну, які мае адбыцца. Міністэрствы транспарту адпрацавалі адпаведны пытанні. Гэта будуць дастаткова выгадныя для абодвух бакоў праекты», — цытуе прэм'ер-міністра Беларусі прэс-служба ўрада.
Мясніковіч прапанаваў мангольскаму боку «шырэй выкарыстоўваць магчымасці чыгуначнага транзіту праз Беларусь». Ён таксама заявіў аб гатоўнасці выдзялення Манголіі экспартнага крэдыту на куплю беларускай кар'ернай тэхнікі, прапанаваў падумаць над сумеснымі праектамі ў сферы сельскай гаспадаркі. «Мы стварылі пэўную інфраструктуру для таго, каб нашы «БелАЗы» маглі прадавацца і працаваць непасрэдна ў кар'ерах на радовішчах у Манголіі. У нас дастаткова амбіцыйныя планы па гэтым пытанні. Думаю, што продажы ў найбліжэйшыя год-паўтара будуць вылічацца дзясяткамі адзінак нашай цяжкай кар'ернай тэхнікі», — зазначыў прэм'ер-міністр.
На думку бакоў, з адкрыццём пасольства Беларусі ва Улан-Батары эканамічнае супрацоўніцтва паміж дзвюма краінамі павінна быць істотна актывізаванае. Прэзідэнт Манголіі высока ацаніў ініцыятывы Аляксандра Лукашэнкі па вырашэнні ўкраінскага крызісу, паведамляе прэс-служба.
Падчас перамоў з прэм'ер-міністрам Таджыкістана Кахірам Расулзада Мясніковіч прапанаваў яму наведаць Беларусь у лістападзе—снежні гэтага года. Абмеркаваны перспектывы закупкі беларускай кар'ернай тэхнікі, зборкі трактароў у Таджыкістане, пастаўкі беларускай сельгаспрадукцыі.
З першым віцэ-прэм'ерам Туркменістана Рашыдам Мерэдавым кіраўнік беларускага ўрада падрабязна абмеркаваў падрыхтоўку запланаванага на кастрычнік візіту ў Беларусь прэзідэнта Туркменістана Гурбангулы Бердымухамедава. Бакі разгледзелі пытанні, звязаныя з будаўніцтвам Гарлыкскага горна-абагачальнага камбіната.
Апрача таго, адбыліся сустрэчы Міхаіла Мясніковіча з прэзідэнтам Ірана Хасанам Рухані і прэзідэнтам Славеніі Борутам Пахорам.
