У Брэсце спынена дзейнасць арганізатара інтэрнэт-крамы па продажы наркотыкаў.
Як паведаміў начальнік крымінальнай міліцыі Ленінскага РАУС Брэста Дзмітрый Каравякоўскі, у красавіку гэтага года 18-гадовы хлопец, які нідзе не працуе, стварыў інтэрнэт-краму па продажы, у тым ліку жыхарам Брэста, шляхам «закладак» у тайнікі марыхуаны, гашышу і асабліва небяспечных псіхатропных рэчываў.
12 верасня наркадылера затрымалі ў Брэсце супрацоўнікі аддзялення па наркакантролі і процідзеянні гандлю людзьмі Ленінскага РАУС Брэста сумесна з упраўленнем па наркакантролі і процідзеянні гандлю людзьмі УУС Брэсцкага аблвыканкама.
Малады чалавек прыехаў у рэгіён, для таго каб закласці ў тайнікі наркатычныя рэчывы розных відаў і доз. У момант затрымання ў кішэні яго адзення было знойдзена 15,66 г марыхуаны.
У ходзе агляду кватэры ў Брэсце, дзе спыніўся грамадзянін, знойдзена і канфіскавана 2,5 кг марыхуаны, 4 кг курыльных сумесей, 80 г гашышу, 1,5 тыс. «марак», 0,5 кг псіхатропнага рэчыва альфа-PVP, 2 віды рэагенту агульнай вагой каля 170 г, упаковачны матэрыял.
Затым супрацоўнікамі міліцыі ў гаражы, які здымае хлопец па месцы жыхарства, было канфіскавана больш за 1 кг курыльных сумесей, каля 100 грамаў рэагенту, некалькі рэспіратараў і ўпаковачны матэрыял.
На ценявым рынку канфіскаваныя наркатычныя рэчывы каштуюць каля 300 тыс. долараў ЗША.
У дачыненні да маладога чалавека распачата справа па ч. 2 арт. 328 Крымінальнага кодэкса. «Па выніках экспертыз канфіскаваных рэчываў дзеянні затрыманага могуць быць перакваліфікаваны па ч. 3 арт. 328 КК, санкцыя якой прадугледжвае пакаранне ў выглядзе пазбаўлення волі да 13 гадоў з канфіскацыяй маёмасці», — падкрэсліў Каравякоўскі.
Ён адзначыў, што грамадзянін прыехаў у Брэст пасля таго, як 4 верасня супрацоўнікі міліцыі затрымалі кіраванага ім віртуальна «закладчыка» — 24-гадовага брэстаўчаніна. Пры затрыманні ў таго была канфіскавана партыя спайса і «марак». У дачыненні да брэстаўчаніна распачата справа па ч. 3 арт. 328 КК.
Вядзецца праца па ўстанаўленні ўсіх удзельнікаў наркатрафіку, а таксама асоб, якім яны збывалі наркатычныя рэчывы.