«ГАІ Мінгорісполкома», хоць ты ім кол на галаве чашы

Пасведчанне кіроўцы на трасянцы, а талон усё адно па-расейску!

11.02.2011 / 14:05

Пасля гучнага скандалу з пасведчаннямі кіроўцы на трасянцы ДАІ паабяцала выправіць прыкры хіб і больш не паўтараць яго. Але літаральна ўчора карэспандэнт «Нашай нівы» атрымаў новае пасведчанне з той самой памылкай — «ГАІ МІНГОРІСПОЛКОМА». Супрацоўнікі ДАІ паабяцалі абмяняць яго бясплатна, але

ўсплыў яшчэ адзін хіб — «недабеларускаскасць» талона, які прыкладаецца да пасведчання.

Нягледзячы на просьбу аформіць усе дакументы па-беларуску, ДАІ ўзяла расійскамоўны ўзор дакумента і проста надрукавала на ім беларускія імя, прозвішча і злапомны «ГАІ МІНГОРІСПОЛКОМА».

Гэта значыцца, што графы «статья КоАП РБ», «Дата нарушения», «Вид взыскания» і іншыя так і не перакладзеныя. Чаму зноў недапрацоўка?

У прэс-службе ДАІ Міністэрства ўнутраных спраў у карэспандэнта «Нашай Нівы» адразу спыталі: «Гэта не вы напісалі на Анлайнеры (на форуме Onliner.by ідзе актыўнае абмеркаванне сітуацыі з новымі пасведчаннямі) пра памылкі?» Даведаўшыся, што пытанне беларускасці пасведчанняў хвалюе далёка не аднаго чалавека, супрацоўнікі параілі вярнуцца ў ДАІ і абмяняць дакументы ў начальства.

Наконт талона было заяўлена, што «гэта такі стандартны выгляд», але супрацоўнікі ДАІ пагадзіліся, што змогуць вырабіць і «нестандартны».

Сёння ўвечары карэспандэнт «Нашай Нівы» паспрабуе дабеларусіфікаваць свае дакументы.

Яўген Васількоў