«Баер» з Леверкузэна ўпершыню ў сваёй гісторыі стаў чэмпіёнам Германіі па футболе
У матчы 29-га тура нямецкай Бундэслігі клуб разграміў на сваім полі брэменскі «Вердэр» з лікам 5:0 і за пяць тураў да фінішу стаў пераможцам турніру.
14.04.2024 / 20:23
«Баер» упершыню ў сваёй гісторыі стаў чэмпіёнам Германіі па футболе. Фота: Martin Meissner / AP
Галы забілі нігерыец Віктар Баніфэйс, швейцарскі футбаліст косаўскага паходжання Граніт Джака, што прыйшлі ў клуб мінулым летам. А потым хет-трык аформіў 20-гадовы ўнікум, гулец нямецкай зборнай Флорыян Вірц. Пасля пятага гола фанаты выбеглі на поле на 89-й хвіліне
Да гэтага мюнхенская «Баварыя» 11 разоў запар станавілася чэмпіёнам краіны, але — іронія лёсу — з прыходам нефартовага форварда Гары Кейна яе вяршэнства спынілася.
«Баер» ніколі ў сваёй гісторыі не станавіўся чэмпіёнам Германіі, пяць разоў заваяваўшы срэбра, за што атрымаў мянушку «Неверкузэн» (г.зн. ніколі не выйграваў). Праўда, аднойчы выйграў Кубак Германіі і аднойчы Кубак тады яшчэ УЕФА.
Але цяпер у каманды іншая мянушка — «Неверлузэн». «Баер» са жніўня наогул нікому не прайграваў: ні ў чэмпіянаце Германіі, ні ў Кубку краіны, ні ў Лізе Еўропы.
Хабі Алонса. Фота: Martin Meissner / AP
Але галоўны творца перамогі — галоўны трэнер, баск Хабі Алонса, колісь зорка «Ліверпуля», «Рэаа» і «Баварыі». Алонса быў трэнерам юнакоў у мадрыдскім «Рэале», трэніраваў другую каманду «Рэала Сасьедада», у кастрычніку 2022 года яго прызначылі галоўным трэнерам «Баера». Каманда тады займала перадапошняе месца ў чэмпіянаце Германіі. У першы сезон Алонса зацягнуў «Баер» на шостае месца і ў Лігу Еўропы, а сёння зрабіў чэмпіёнам Германіі.
Прычым Хабі Алонса адмовіўся ў наступным сезоне пераходзіць у «Баварыю» ці «Ліверпуль», сказаўўшы, што застанецца ў «Баеры».
Казка, якую сёння скончыў пісаць «Баер», параўнальная з чэмпіёнскім сезонам «Лестэра» ў чэмпіянаце Англіі ў сезоне 2015-2016.