Дзмітрый Пяскоў заклікаў Паўла Дурава пільней сачыць за тэлеграмам
Маўляў, месенджар «усё больш становіцца інструментам у руках тэрарыстаў».
28.03.2024 / 10:47
Alexei Danichev, Sputnik, Kremlin Pool Photo via AP
Дзмітрый Пяскоў заклікаў Паўла Дурава больш уважліва сачыць за тэлеграмам, заявіўшы, што месенджар «усё больш становіцца інструментам у руках тэрарыстаў». Пра гэта прэс-сакратар прэзідэнта Расеі сказаў у каментары тэлеграм-каналу Shot, адказваючы на пытанне аб тым, ці плануюць улады Расіі заблакаваць тэлеграм, піша «Медуза».
«Не, ніякіх планаў такіх [па блакаванні] зараз няма. Але, безумоўна, мы чакалі б ад Паўла Дурава большай увагі.
Таму што гэты ўнікальны і фенаменальны з тэхналагічнага пункту гледжання рэсурс, які вырас на вачах у нашага пакалення, ён усё больш становіцца інструментам у руках тэрарыстаў, выкарыстоўваецца ў мэтах тэрарыстычных», — заявіў Пяскоў.
27 сакавіка агенцтва РІА Навіны напісала са спасылкай на крыніцу, што падазраваных у здзяйсненні тэракту ў «Крокус Сіці Холе» завербавалі праз тэлеграм-канал, які належыць афганскаму крылу «Ісламскай дзяржавы» і працуе на аўдыторыю ў Таджыкістане.
У сваю чаргу, кіраўніца прэс-службы пецярбургскіх судоў Дар'я Лебедзева 27 сакавіка паведаміла, што з Расіі вышлюць грамадзяніна Таджыкістана, які быў у групе ў тэлеграме, праз якую былі завербаваныя абвінавачаныя ў тэракце ў «Крокусе».