Еўрасаюз зацвердзіў 12-ы пакет санкцый супраць Расіі
Як паведаміла прэс-служба Рады Еўрасаюза, «у 12-м пакеце мы прапануем магутны набор эканамічных мераў, якія яшчэ больш аслабяць расійскую вайсковую машыну». У новым пакеце, у прыватнасці, забаронены імпарт расійскіх ювелірных алмазаў.
18.12.2023 / 19:58
Фота: Thomas Trutschel/Photothek via Getty Images
Згодна з дакументам, новы пакет санкцый уключае ў сябе:
- прамы або ўскосны імпарт, куплю або перадачу алмазаў з Расіі. Гэтая забарона распаўсюджваецца на алмазы, якія паходзяць з Расіі, алмазы, экспартаваныя з Расіі, алмазы, якія ідуць транзітам праз Расію, і расійскія алмазы, апрацаваныя ў трэціх краінах;
- новыя экспартныя абмежаванні супраць Расіі на прадукцыю і тэхналогіі падвойнага прызначэння;
- забарона на імпарт з Расіі звадкаванага прапана, меднага і алюмініевага дроту, літыевых акумулятараў, камплектуючых для БПЛА;
- забарона грамадзянам Расіі займаць кіраўнічыя пасады ў еўрапейскіх кампаніях, звязаных з крыптавалютамі;
- уключэнне ў чорны спіс 140 фізічных асоб і кампаній.
У спіс тых, хто непасрэдна падтрымлівае расійскі ваенна-прамысловы комплекс, уключаныя 29 новых арганізацый. Іх закрануць больш жорсткія экспартныя абмежаванні на тавары і тэхналогіі падвойнага прызначэння, а таксама на тавары і тэхналогіі, якія спрыяюць паляпшэнню расійскага абароннага сектара і бяспекі.
У той жа час ЕС вырашыў зрабіць выключэнні з абмежаванняў на імпарт прадметаў асабістага карыстання, а таксама для аўтамабіляў, якія маюць дыпламатычныя нумарныя знакі для ўезду ў ЕС.
Чытайце таксама:
Аўстрыя разблакавала санкцыі супраць Расіі. Але Украіна пайшла ёй на саступкі па банку Raiffeisen
Заходнія краіны могуць канфіскаваць замарожаныя актывы Расіі «ў адпаведнасці з міжнародным правам»
У праект 12-га пакета санкцый Еўрасаюза за вайну ва Украіне трапілі 11 беларусаў