У атмасферным кутку Мінска зносяць старую забудову
Раён велазавода некалькі гадоў жыве ў чаканні перамен. Яшчэ ў 2017 годзе быў прэзентаваны план рэканструкцыі «Пралетаркі», які прадугледжваў знос дзясятка жылых двух– і трохпавярховікаў. Некаторыя дамы ў раёне ўжо адсялілі, аднак будынкі ніхто не чапаў. І вось нядаўна мясцовыя жыхары заўважылі, што ў дварах зʼявілася будаўнічая тэхніка. Тут ужо знеслі адзін з былых інтэрнатаў. Realt.by паглядзеў, як праходзіць знос.
11.09.2023 / 11:17
Завадскія пасёлкі (аўтазавода, трактарнага завода і велазавода) зʼявіліся ў Мінску пасля вайны. Згодна з канцэпцыяй «гарады ў горадзе» праектавалі такія пасёлкі разам з усёй неабходнай інфраструктурай — дзіцячымі садамі, паліклінікамі, дамамі культуры і стадыёнамі. Менавіта такі «гарадок» узнік і побач з Партызанскім праспектам. Жылыя дамы ў 2-3 паверхі ўзвялі на вуліцах Велазаводскай, Нахімава, Стралковай.
У 2017 годзе жыхарам раёна прэзентавалі план рэканструкцыі «Пралетаркі». Зношаны жылы фонд прапаноўвалася знесці і забудаваць шматпавярховымі дамамі, гандлёвымі цэнтрамі і паркінгамі. Нягледзячы на тое, што старажылам раёна праект не моцна спадабаўся, у 2018 годзе яго з некаторымі зменамі зацвердзілі.
За мінулыя гады гарадскія ўлады адсялілі жылыя двухпавярховікі на няцотным баку Нахімава, а таксама былыя інтэрнаты на Стралковай, Станіслаўскага, РыбалкІ і Нахімава. У пустых будынках забілі вокны, заварылі падʼезды, але далей справа не рухалася.
І вось нядаўна ў двары на вуліцы Нахімава зʼявілася будаўнічая тэхніка. Першай пад бульдозер адправіўся былы будынак інтэрната для работнікаў мотавелазавода пад нумарам 13а. Цяпер ад трохпавярховага дома засталася толькі груда будаўнічага смецця.
Верагодна, зусім хутка пад знос пойдзе і суседні будынак (таксама былы інтэрнат). Побач з ім зараз складуюць смецце. Адзначым, што знос у раёне вуліц Рыбалкі, Велазаводскай і Нахімава, а таксама падрыхтоўка вызваленых пляцовак пад новае жыллёвае будаўніцтва прадугледжаны інвестыцыйнай праграмай Мінска на 2023 год.
Згодна з раней зацверджаным планам на вуліцы Нахімава планавалася знесці дамы № 11, 13, 15, 13а і 17а.
Месца адселеных дамоў павінна заняць шматпавярховая забудова. Пра гэта ў чэрвені гэтага года казаў кіраўнік адміністрацыі Ленінскага раёна Раман Мельнік.
У адміністрацыі Ленінскага раёна па тэлефоне дэталі планаванай жылой забудовы журналістам раскрываць не сталі. У райвыканкаме сказалі, што замоўцам будаўніцтва тэрыторыі будзе выступаць УКБ Мінгарвыканкама.
У раёне таксама працягваецца і будаўніцтва ад камерцыйнага забудоўшчыка — на месцы знесеных вытворчых пабудоў узводзіцца жылы комплекс «Антонаўскі квартал».
Чытайце таксама: