У Лагойску трэція суткі няма вады. Зусім ніякай
Прычынай называюць засуху.
09.06.2023 / 12:37
Фота: Logoysk.by
У Лагойску праз засуху жыхары сядзяць без вады ўжо трэція суткі. У мясцовых чатах лагойцы пачалі скардзіцца на праблемы з водазабеспячэннем яшчэ ў аўторак, 7 чэрвеня. Да наступнай раніцы вады не было ўжо амаль ва ўсіх кватэрах горада, піша Tochka.by.
Праблему абяцалі выправіць на працягу сутак. Аднак гараджане скардзяцца ў сацсетках, што вады ў горадзе па-ранейшаму няма.
Прычыну патлумачылі ў Вілейскім водаканале. Аказалася, уся справа ў засухі.
Падачу вады ў горад забяспечвае ў асноўным водазабор «Ніўкі». З-за адсутнасці дажджу і масавага паліву прысядзібных участкаў рэзервуар быў спустошаны.
«Акрамя таго, практычна вычарпаліся воды, ад якіх ён папаўняўся. Каб зняць праблему, кіраўніцтвам Вілейскага водаканала было прынята рашэнне паглыбіць свідравіну, нарасціць трубы і апусціць помпу. Усе падрыхтоўчыя работы былі выкананыя загадзя», — заявілі ў водаканале, адзначыўшы, што 7 чэрвеня быў мантаж абсталявання.
Зараз у горадзе арганізаваны падвоз вады, забяспечваюцца вадой і дзіцячыя сады, школы, бальніцы і іншыя сацыяльныя аб'екты.
Чытайце таксама: