У Беларусі футбольны клуб узначаліў экс-пракурор
На пасаду старшыні футбольнага клуба «Дняпро-Магілёў», які выступае ў першай лізе, прызначаны Сяргей Капытаў.
08.06.2023 / 14:30
Сяргей Капытаў. Фота: ФК «Дняпро»
«Склаўся для гэтага шэраг абставінаў. Я, шчыра скажу, сюды не збіраўся, — расказаў Сяргей Капытаў прэс-службе каманды. —. Мяне сюды запрашалі і 10 гадоў таму, і 5 гадоў таму. Але быў не гатовы. Мне было няпроста з'ехаць з Мінска. Гэта першае. Там усё ж такі ў мяне жонка і дзеці, праца. Я працаваў у такой структуры, з якой не так ужо і проста сысці.
А чаму «Дняпро»? Я хоць і гуляў у баскетбол, але на ўсе футбольныя матчы хадзіў. На стадыёне «Спартак» многіх па магілёўскіх мерках вялікіх футбалістаў асабіста бачыў: Кабранкоў, Насташэўскі, «залаты» склад «Дняпра». У мяне да гэтага часу з многімі хлопцамі добрыя адносіны, у свой час аказваў ім пэўную дапамогу».
«Хоць і пражыў агулам 18 гадоў у Мінску, але мінчуком не стаў. Я ўсё роўна магілёвец, за гэты горад заўсёды перажываў, і за «Дняпро» у тым ліку. Гэта толькі апошні год не хадзіў у Магілёве на футбол. Да гэтага быў пастаянным госцем на матчах «Дняпра». Гісторыя ў клуба вельмі багатая», — патлумачыў ён.
У яго планах вярнуць клуб у вышэйшую лігу (зараз «Дняпро» выступае ў першай) і замацавацца ў ёй.
Раней Сяргей Капытаў працаваў у пракуратуры Магілёўскай, а затым Мінскай вобласці, дзе ўзначальваў аддзел па наглядзе за выкананнем заканадаўства абласным УСК.
«Дняпро» (Магілёў) быў чэмпіёнам краіны ў 1998 годзе, а ў 2019 годзе вылецеў з вышэйшай лігі і з-за фінансавых праблем быў распушчаны, пасля чаго адноўлены пад назвай «Дняпро-Магілёў».
Чытайце таксама:
Клуб, які заняў 9-е месца ў чэмпіянаце Беларусі, выступіць у еўракубках. Як такое магчыма?
З беларускіх футбольных клубаў працягваюць здымаць ачкі
У салігорскага «Шахцёра» забралі чэмпіёнства 2022 года, а таксама 30 ачкоў у гэтым сезоне
Чаму апошні кейс з дагаварнякамі ў беларускім футболе — лютая ганьба