Падчас саміта NATO ў Вільні вывесяць 33 тысячы ўкраінскіх сцягоў
Віленскі муніцыпалітэт далучаецца да ініцыятывы падтрымкі ўступлення Украіны ў Альянс. 7—11 ліпеня ў сталіцы Літвы вывесяць не менш за 33 000 украінскіх сцягоў. Гарадскія ўлады падкрэслілі, што іх купілі і развесяць за кошт арганізатараў. Да ініцыятывы заклікаюць далучыцца жыхароў і адміністратараў шматкватэрных дамоў, піша Delfi.
08.06.2023 / 11:38
Фота: Наша Ніва
Сталічная рада ўхваліла рэзалюцыю аб удзеле ў ініцыятыве «Падымаю сцяг за Украіну ў NATO», якую арганізуюць грамадскія арганізацыі «Моцныя разам» і Blue/Yellow.
11-12 ліпеня ў Вільні пройдзе саміт NATO, з'едуцца лідары Альянсу, тысячы журналістаў з усіх краін свету. Выбраная колькасць сцягоў сімвалічна — Украіна магла б стаць 33-ім членам НАТА.
«З пачатку вайны мы актыўна падтрымліваем Украіну. Мы хочам, каб наша падтрымка была бачная і падчас саміта NATO. Мы разумеем маштаб і важнасць гэтай сустрэчы ў кантэксце сусветных палітычных падзей, разумеем і магчымасць звярнуць яшчэ больш увагі свету на становішча ва Украіне і на яе жаданне стаць сябрам альянсу», — сказаў мэр Вільні Валдас Бенкунскас.
Мэр заклікае жыхароў і адміністратараў шматкватэрных дамоў прыняць удзел у гэтай ініцыятыве. Ён падкрэсліў, што дадаткова ніякіх укладанняў не спатрэбіцца — пра ўсё паклапоцяцца арганізатары ініцыятывы.
Чытайце таксама:
Некаторыя сябры NATO могуць увесці войскі ва Украіну — былы генеральны сакратар
Літоўцы непакояцца, што Лукашэнка можа зноў выкарыстаць нелегальных мігрантаў падчас саміту NATO