«Heta jaho ŭkrainski praciah». Ukrainskaja deputatka zajaviła, što naradziła ad Saakašvili
1 červienia ŭ Dzień abarony dziaciej 32-hadovaja deputat Viarchoŭnaj Rady Lizavieta Jaśko abviaściła, što stała mamaj. Baćkam jaje pieršynca źjaŭlajecca były prezident Hruzii, 55-hadovy Michieił Saakašvili, jaki bolš za paŭtara hoda znachodzicca ŭ turmie.
02.06.2023 / 08:00
Svajmu maciarynstvu Liza pryśviaciła kranalny post, u jakim nazvała dzicia ŭkrainskimi karaniami i ŭkrainskim praciaham jaho baćki. Poł malaniaci Jaśko nie ŭdakładniła, nie paviedamiła, kali mienavita adbylisia rody, piša «Ukrainskaja praŭda».
Heta fota Jaśko i Saakašvili apublikavali ŭ siecivie jašče ŭvosień 2021 hoda
«Nikoli nie mahła ŭjavić, što majo dzicia narodzicca ŭ hetych strašnych reałijach vajny dla našaj krainy. U dzień pačatku leta, bolšaść z nas nie spali apošnija dni. My nie dumajem pra leta. My dumajem ab abaronie našych dziaciej. Dziaciej, jakija, na žal, nie mohuć mieć biaśpieku ŭ svaim domie z-za poŭnamaštabnaj ahresii Rasii.
Nikoli sabie nie mahła ŭjavić, što pobač na voli i ŭ zdaroŭi nie budzie baćki dziciaci ŭ vielmi važnyja momanty, jakija my płanavali być razam. Majo dzicia — maja luboŭ. Dla baćki naša dzicia — heta jaho ŭkrainskija karani i ŭkrainski praciah, pra jaki jon maryŭ i tak chacieŭ mieć, hanaračysia svaim pašpartam hramadzianina Ukrainy.
Nikoli nie dumała, što naradzić dzicia padčas vajny — heta nasamreč strašna. Strašna i vielmi žudasna ad dumak pra budučyniu. My zusim pa inšamu ŭsio ŭjaŭlali. Abstaviny i realnaść byli zusim inšymi».
Liza stała mamaju ŭpieršyniu, a Michieił — baćkam čacvierty raz. Fota: sacsietki
Pra raman tady jašče žanataha Saakašvili ź Jaśko stała viadoma ŭ listapadzie 2020-ha. Paźniej žonka eks-prezidenta Hruzii Sandra Rułafs zajaviła, što jaho zdrada była dla jaje niečakanaściu.
U studzieni 2022 hoda akazałasia, što akramia dvuch synoŭ ad eks-žonki, u Michieiła jość jašče pazašlubnaja dačka.
Saakašvili znachodzicca za kratami z 1 kastryčnika 2021 hoda, z momantu tajnaha viartańnia ŭ Hruziju napiaredadni miascovych vybaraŭ.
Kali stała viadoma pra ich adnosiny, Jaśko adrazu zapeŭniła, što heta kachańnie
Čytajcie taksama:
Skura dy kości: Saakašvili pakazaŭ nastupstvy znachodžańnia pad vartaj
Saakašvili zajaviŭ, što pamiraje
Prezident Hruzii: Saakašvili nie vyzvalać navat z maim pamiłavańniem