«Ja acaniŭ jaho žart». Pierapałka Takajeva i Łukašenki praciahvajecca
Prezident Kasym-Žamart Takajeŭ zajaŭlaje, što ŭ Kazachstana niama nieabchodnaści ŭstupać u sajuznuju dziaržavu i jadziernaja zbroja jaho krainie taksama nie patrebnaja. Tak jon adkazaŭ Alaksandru Łukašenku.
29.05.2023 / 11:33
Kasym-Žamart Takajeŭ. Fota: LyazaTretyakova / depositphotos.com
Prezident Kasym-Žamart Takajeŭ adkazaŭ Łukašenku, jaki prapanavaŭ Kazachstanu i inšym krainam, što chočuć mieć jadziernuju zbroju, ustupić u Sajuznuju dziaržavu.
«Ja pa vartaści acaniŭ jaho žart. Ja dumaju, što nieabchodnaści ŭ hetym niama, pakolki isnujuć i inšyja intehracyjnyja abjadnańni, pierš za ŭsio, Jeŭrazijski ekanamičny sajuz.
Što tyčycca jadziernaj zbroi, to jana nam nie treba, pakolki my dałučylisia da Damovy ab nieraspaŭsiudžańni jadziernaj zbroi i Damovie ab zabaronie vyprabavańniaŭ jadziernaj zbroi. My zastajemsia viernymi abaviazacielstvam u ramkach hetych mižnarodnych dakumientaŭ», — skazaŭ jon.
Prezident Kazachstana Kasym-Žamart Takajeŭ nazvaŭ prablemaju stupień intehracyi pamiž Biełaruśsiu i Rasijaj i astatnimi krainami JEAES.
Na Jeŭrazijskim ekanamičnym forumie 24 maja jon adznačyŭ, što heta pytańnie treba abmiarkoŭvać. «U nas jość u Jeŭrazijskim ekanamičnym sajuzie Sajuznaja dziaržava. Heta značyć, u suśvietnaj palityčnaj historyi stvorany ŭnikalny precedent abo fienomien, jak chočacie. Stvareńnie dziaržavy pa formule «dźvie krainy — adna dziaržava» z adzinaj palityčnaj, jurydyčnaj, vajskovaj, ekanamičnaj, valutnaj, kulturnaj, humanitarnaj prastoraj, z adzinym sajuznym uradam, z adzinym sajuznym parłamientam. Nu, ja prašu prabačeńnia, i navat jadziernaja zbroja adna na dvaich zaraz», — skazaŭ jon.
Alaksandr Łukašenka pabačyŭ u słovach Takajeva inšaje. Jon zajaviŭ, što tyja, chto choča jadziernuju zbroju, chaj ustupaje ŭ sajuz Rasii i Biełarusi.
«U sajuz Biełarusi z Rasiejaj treba ŭstupać, i ŭsio: budzie jadziernaja zbroja na ŭsich», — zajaviŭ Łukašenka.
Čytajcie taksama:
Dzie raźmieściać rasijskuju jadziernuju zbroju, vybuch jakoj moža źniščyć ceły horad?