Va Ukrainie 17-hadovaha karekciroŭščyka rasijskaj artyleryi asudzili na 10 hadoŭ kałonii
Viasnoj 2022 hoda niepaŭnaletni žychar Bachmuta ŭ telehramie paznajomiŭsia ź infarmataram rasijskich śpiecsłužbaŭ dy pahadziŭsia dapamahčy vieści bajavyja dziejańni suprać uzbrojenych sił Ukrainy.
25.05.2023 / 15:30
Z 30 maja i da 19 lipienia jon pieradavaŭ infarmacyju ab raźmiaščeńni ŭkrainskich vajskoŭcaŭ i nastupstvach rasijskich abstrełaŭ — dasyłaŭ skrynšoty kart z adznakami i hałasavyja paviedamleńni, piša «Ukrainskaja praŭda».
Jaho surazmoŭca, u svaju čarhu, atrymanuju infarmacyju pieradavaŭ sakretnamu pazaštatnamu supracoŭniku «DNR» i byłomu načalniku raźviedki artyleryi 100-j bryhady DNR.
U červieni 2022-ha chłopca dadali ŭ zakrytuju hrupu ŭ telehramie, udzielnikami jakoj byli rabotniki śpiecsłužbaŭ RF i niezakonnych uzbrojenych farmavańniaŭ, a taksama inšyja zavierbavanyja karekciroŭščyki.
12 lipienia 2022 hoda chłopiec pieradaŭ skrynšoty karty z adznakami pra miescaznachodžańnie asabistaha składu i vajennaj techniki i srodak suviazi Starlink. 19 lipienia rasijanie abstralali hetuju pazicyju. U toj ža dzień abvinavačany schadziŭ u raźviedku na miesca trapleńnia rakiet.
Paśla hetaha jon paviedamiŭ, što ŭkrainskija vajskoŭcy ŭsio jašče tam zastajucca. 22 lipienia akupanty abstralali abjekt druhi raz.
Chłopca zatrymali ŭ žniŭni 2022 hoda i ŭziali pad vartu. Zaraz jamu nie bolš za 17 hadoŭ.
Dziejańni abvinavačanaha kvalifikavali jak kałabaranctva.
U sudzie junak vinu pryznaŭ całkam i ad dačy pakazańniaŭ admoviŭsia. Jaho prysudzili da 10 hadoŭ turemnaha pakarańnia.