«My hatovyja, chaj prychodziać». Łukašenka prakamientavaŭ zajavy eks-ministra abarony Polščy pra dapamohu vojskam biełaruskaj apazicyi
Alaksandr Łukašenka adkazaŭ na słovy eks-namieśnika ministra nacyjanalnaj abarony Polščy hienierała Valdemara Skšypčaka pra toje, što Polšča maje padtrymać «vojski, jakija buduć vieści apieracyju suprać Łukašenki».
25.05.2023 / 12:45
Alaksandr Łukašenka adkazaŭ na słovy eks-namieśnika ministra nacyjanalnaj abarony Polščy hienierała Valdemara Skšypčaka. Skryn videa
Łukašenka skazaŭ, što jon i sam raniej kazaŭ, što jany (jon nie patłumačyŭ, chto mienavita) rychtujucca da «paŭstańnia ci revalucyi» ŭ Biełarusi.
«My heta viedajem daŭno, my adsočvajem hetych chłopcaŭ, jakich hety chvory hienierał… što tam stvarajucca charuhvy, pałki, jany heta tak nazyvajuć… my viedajem, dzie jany znachodziacca, i pa imionach viedajem. Chaj prychodziać, my hatovyja», — skazaŭ Łukašenka ŭ Maskvie kanału «Rasija».
Učora źjaviłasia rezanansnaje intervju byłoha namieśnika ministra abarony hienierała Valdemara Skšypčaka telekanału Polsat.
«Treba być hatovymi padtrymać vojski, jakija buduć vieści apieracyju suprać Łukašenki», — skazaŭ jon.
«Davajcie rychtavacca da paŭstańnia ŭ Biełarusi, bo jano adbudziecca. Havorka pra toje, kab my nie praspali hety momant», — dadaŭ jon.
«Rasija abaronić bratniuju Biełaruś» — tak na zajavy polskaha hienierała adreahavali ŭ Kramli.
«Naturalna, Rasijskaja Fiederacyja maje abaviazacielstvy pa harantavańni biaśpieki Biełarusi, što my i budziem rabić pierad abliččam takoj vidavočnaj pahrozy», — skazaŭ pres-sakratar Kramla Dźmitryj Piaskoŭ.