Rekordnaja dla Małdovy kolkaść demanstrantaŭ sabrałasia na schod u padtrymku jeŭraintehracyi
U Vialikim Jeŭrapiejskim schodzie, jaki prachodziŭ siońnia ŭ centry Kišyniova, pryniali ŭdzieł ad 75 — 80 tysiač čałaviek, piša NewsMaker sa spasyłkaj na palicyju.
21.05.2023 / 14:36
U Vialikim Jeŭrapiejskim schodzie, jaki prachodziŭ siońnia ŭ centry Kišyniova, pryniali ŭdzieł ad 75 — 80 tysiač čałaviek. Fota: NewsMaker
Pres-sakratar Hieninśpiektarata palicyi Dyjana Fietka pacvierdziła NewsMaker hetu ličbu i zaznačyła, što pravaachoŭniki, jakija zabiaśpiečvali paradak na mierapryjemstvie, nie zarehistravali nivodnaha incydentu.
21 maja ŭ centry Kišyniova adbyŭsia Vialiki jeŭrapiejski schod, abvieščany prezidentkaj Majaj Sandu. Pierad prysutnymi vystupiła sama kiraŭnik dziaržavy, a taksama kiraŭnik Jeŭraparłamienta Rabierta Mietsoła, jakaja prybyła ŭ Małdovu śpiecyjalna dla hetaha.
Udzielniki schodu pryniali rezalucyju ŭ padtrymku jeŭrapiejskaj intehracyi Małdovy.
U dakumiencie zaznačajecca, što Małdova imkniecca stać paŭnapraŭnaj častkaj Jeŭrasajuza, jaki moža harantavać stabilnaść i dazvolić realizavać svoj patencyjał.
Udzielniki zboru taksama zaklikali ŭsie palityčnyja siły krainy padtrymać jeŭrapiejski kurs krainy. Dla hetaha, na dumku mitynhoŭcaŭ, nieabchodna prapisać u Kanstytucyi Małdovy jaje metu ŭstupić u ES, zabiaśpiečyć bolš chutki pačatak pierahavoraŭ ab ustupleńni ŭ sajuz, a taksama padtrymać umacavańnie dziaržstruktur dla dasiahnieńnia hetaj mety.